Залда «Грани яркого таланта» деб къуралгъан кёрмючде поэтни китаблары, аны джашаууну, творчествосуну юсюнден джазылгъан газетле салыннган эдиле. Ала Динаны поэзиясы адамлагъа ашхылыкъ теджегенине, туугъан джуртуна сюймеклигине, Аллахдан келген фахмусу бла миллет маданиятны ёсюмюне къошхан юлюшюне шагъатлыкъ эдиле.
Библиотеканы къуллукъчулары алайгъа келген Черкесскеде 2-чи, 12-чи номерли школланы сохталарын эмда башхаланы поэтни творчествосу, джашау джолу бла шагъырей этдиле.
Мамчуланы Дина джети назму китабны, республиканы къарачай кърал театры салгъан «Мурат бла Зумрат», «Аланны батханы», «Акъбийче бла Рамазан», «Волшебный напиток Карачая» деген пьесаланы авторуду. Аны терен магъаналы чыгъармалары башха тиллеге да кёчюрюлгендиле. Алагъа Эресейни кёб джерлеринде, тыш къраллада да окъуучула уллу багъа бергендиле.
Мамчуланы Динаны бу тюбешиуде ата джуртха, халкъланы арасында шохлукъгъа, сейир табигъатха аталгъан назмулары къарачай, орус тилде да азбар айтылыб турдула.
Эстрада джырланы усталары Малсюйгенланы Ислам бла Чотчаланы Зульфия Дина кеси этген эмда аны назмуларына башхала макъам салгъан джырланы джырлаб эшитдирдиле.
Шебзухова И.,
библиотеканы къуллукъчусу.
