Кёб болмай Москва областны Красногорск шахарыны Джарыкълыкъ юйюнде сурат кёрмюч ачылгъанды. Ол Шимал Кавказны суратчыларыны «Эки къанат» деген фестивалыны къурамында ишлейди. Кёрмючде Къарачай-Черкесияны иги суратчыларыны ишлери да бардыла.
«Быйыл къыркъаууз (сентябрь) айда бизни фестиваль ючюнчю кере бардырылгъанды. Ол хар джол сайын адамланы эслерин ариулукъну, фахмуну, чемерликни дуниясына бёлгенлей тургъанды. Мындан алгъа болгъан фестивалгъа уа 500 адам джыйылгъан эди. Андан бери юч джылны ичинде айтыргъа тыйыншлы биринчи класслы талай сурат иш джыйылгъанды. Бизни эксперт комиссиябыз аладан 150-ни сайлаб, кёрмючге хазыр этгенди. Бусагъатда Красногорскени Джарыкълыкъ юйюню кёрмючюнде 70 иш барды. Былайгъа андан кёб сыйынмайды», - деб, хапар айтханды «Эки къанат» фестивалны къурагъан Боташланы Расул.
Ол чертгенден, кёрмюч бошалгъандан сора, къалгъан 80 сурат да ол къурамгъа кирликди. Бу кёрмюч, адамланы джылны аягъына дери къууандырыб, келир джылда да, адетдеча, къыркъаууз айдан башлаб ишин этиб башларыкъды.
Ол заманны ичинде экспозиция Москва бла Москва областны тюрлю-тюрлю кёрмючлеринде, Джарыкълыкъ юйлеринде кёргюзюллюкдю. Сурат ишле Москваны шахар Думасыны къабыргъаларына да салынныкъдыла.
Боташ улу айтхандан, Эресей Федерацияны Кърал Думасына, къралны Джамагъат палатасына да сурат ишлени салырча, бюгюнлюкде сёлешине турады.
«Фестивалгъа къошулгъанланы сурат ишлери бири бирине ушамайдыла. Ол ашхы этилген ишле бла биз адамланы джюреклерин Шимал Кавказны ариулугъуна, маданиятына, башха сейир затларына ачаргъа излейбиз. Суратла джерибизни ариулугъун, халкъланы адетлерин, бир-бир джашау турмушларын кёргюзедиле. Огъары Малкъардан, Чирик кёлден, Архызны Бырмамытындан суратчыланы мастер-классларындан келген аламат суратла бардыла. Къарачай-Черкесияны иги суратчыларыны ишлери да адам къууанырчадыла. Аланы арасында Орусланы Ренат салгъан суратланы юслеринден айтыргъа тыйыншлыды. Аны этген ишлерин менден сора да фестивалда болгъан спикерле да махтагъандыла», - дегенди Боташланы Руслан.
«Мени болгъан ишлерим да, Шимал Кавказны, миллетлерини халилери бла, адетлери бла, табигъаты бла байламлыды. Ишлерими бир къаууму кёрмючге киргенине бек къууанама, мындан ары да тохтамай ишлерикме», - дегенди Орус улу.
Узеирланы Хусей.
