Мындан алда Черкесск шахарда Шимал Кавказ кърал гуманитар-технология академияны спорт залында джаш дизайнерлени «Минги Тау» атлы IX-чу халкъла арасы конкурсу болгъанды.

Аны тыйыншлы дараджада бардырыргъа Эресей суратлау академияны президенти Церетели Зураб эмда ол академияны «Союз дизайнеров» атлы халкъла арасы бирлешлигини тамадасы Бобыкин Андрей, ШККъГТА-ны ректору Къочхарланы Руслан башчылыкъ этгендиле.

Тогъузунчу кере бардырылгъан бу тукъум эришиулеге кийим тигиучю усталаны къол ишлерин сюзген бёлекни къурамына атларын бу санагъатда айтдыра келген керти устала киргендиле. Аны себебли сюзюучюлени председателине бирси конкурсладача, быйыл да Атайланы Магомедни къызы Лариса сайланнганды.

Бу къууанч джыйылыуну Баболаны Мурат башчылыкъ этген «Снежные вершины» тепсеу ансамбль джарыкъ программасы бла ачды. Андан сора Къочхарланы Руслан джыйылгъан миллетни аллына чыгъыб, тышындан келген къонакълагъа хошкелди сёз айтыб, эришиуге къошулгъанланы алгъышлай алагъа джетишимле теджеди. Ызы бла КъЧР-ни маданият министри Бороков Рамазан Башчы Темрезланы Рашидни атындан эришиуге къошулгъанланы да, бу магъаналы уллу ишни бардырыргъа болушханланы да алгъышлаб, республиканы миллет маданиятны ёсюмюне эмда сакълаугъа къыйын къошханлагъа да разылыгъын билдирди.

Бу эришиулеге Эресей Федерацияны 36 субъектинден, Джууукъ эмда Узакъ тыш къралладан устала, чемерле къошулгъандыла. Ала эки къауумгъа юлешиннген эдиле: орта школланы сохталары бла усталыкъ берген училищелени студентлерине эмда баш окъуу заведениеледе окъугъан къауумгъа. Эришгенле «Дизайн костюма», «Дизайн среды», «ДПИ», «Изобразительное искусство», «Фотография» номинациялагъа этген затларын кёргюздюле.

Усталаны, чемерлени алгъышларгъа дагъыда башха сыйлы къонакъла келген эдиле. Ала да бу эришиуге къошулгъанланы алгъышладыла, быллай магъаналы ишле хар джыл сайын тохтамай бардырылыргъа кереклисин билдирдиле. Ала КъЧР-де Джамагъат палатаны председатели Молдованова Вера, «Лидеры мирового сообщества» (МСОО) атлы джамагъат бирлешликлени халкъла арасы союзуну Москвада бир бёлюмюню тамадасы Горчакова Лариса, Эресей суратлау академияны академиги Рим Изабелла, МСОО-ну Ара советини члени эмда Индияда чыгъыучу «Вишва Дарпан» газетни баш редактору Арти Сони, «Сто шагов к Кайсыну» проектни эмда фондну башчысы Тетууланы Хадис, андан сора да Пятигорск, Дондагъы Ростов, Владикавказ, Майкоп, Новочеркасск, Ставополь, Невинномысск шахарладан дизайнер устала эдиле.

Бу ашхы джыйылыуну баш магъанасы кийимде эмда турмушда адетлени терен билиу, тюрлю-тюрлю миллетлени маданиятлары эмда санатлары бла шагъырей болуу, халкъланы арасында шохлукъну тутуу, байламлылыкъны бардырыу эди.

Эришиуде баямланнган номинациялагъа кёре этилген затланы кёргюзтгенден сора, чемерлени ишлерине багъа бериучюлеге тынч болмады. Нек десенг, аланы хар бири да кесича магъаналы, тыйыншлы дараджада тигилген затла болдула. Ол себебден, кишини кёлю да къалмазча эришиуге къошулгъанланы барсынына да Сыйлы къагъытла бердиле. Дагъыда дизайн, суратлау эмда графика джаны бла уллу усталыкъ кёргюзгенлени устазларын, окъуу учреждениелени тамадаларын да Бюсюреу къагъытла бла алгъышладыла.

Жюрини председатели Атайланы Лариса барысын да алгъышлаб, джаш дизайнерни байрамына къошулгъанлагъа да джюрек разылыгъын билдирди. Ол джаш усталагъа, дизайнерлеге джангы коллекцияла къошаргъа, мындан ары да аланы къол чемерликлери мийик дараджагъа чыгъарлай уллу джетишимле теджеди. Къууанч джыйылыуну ахырында былайгъа келгенле барысы да джарыкъ тойгъа къошулдула.

БАТЧАЛАНЫ Фатима.