Сарысмакъ ашарыкъдан сора да тюрлю-тюрлю аурууланы багъыуда да кенг хайырландырылады. Сарысмакъны къурамында адамны саулугъуна джарагъан тёртджюзден артыкъ  керекли зат барды. Сарысмакъ адамны санларында джик аурууларын багъыуда бек хайырлыгъа саналады. Артрит, артроз, радикулит, подагра, ревматизм, остеохондроз аурууланы багъаргъа сарысмакъдан этилген дарманны ичген  да, джакъгъан да этедиле. Алай а сарысмакъдан этилген суусунну бюрегинде сууугъу, ашхынында джарасы, гастрити, панкреатити болгъаннга, сылтаулу тиширыугъа ичерге болмайды.

* Сарысмакъдан этилген джик ауруу бла остеохондрозгъа джарагъан суусун (настойка).

300 грамм сарысмакъны ууакъ туураб, юсюне 0,5 литр аракъы къуюб, къараууз мияла шышада къарангы джерге салыб 10 кюнню тутаргъа керекди. Андан сора сюзюб ичиб башларгъа боллукъду. Ичген сагъатда да къарангы сууукъ джерде тутаргъа керекди. Ревматизми, подаграсы, артрити болгъан бу суусунну кюнюне юч кере ашарны аллы бла 20 такъыйкъаны алгъа ичерге керекди - 20-шар тамчыны  стаканны джартысы бир сют бла. Ичерге тыйыншлысы бир айды. Андан сора 10 кюнню солуб дагъыда джангыдан ичиб башларгъа боллукъду. Остеохондрозу, артрозу болгъан бу суусунну 30-шар тамчы ичерге керекди.

Стенокардиясы болгъаннга, сылтаулу тиширыугъа, сют ичирген анагъа бу суусунну ичерге болмайды.

* Сарысмакъдан, лимондан, шибижиден этилген джик ауруу бла омураулагъа джарагъан суусун.

300 грамм ууакъ тууралгъан сарысмакъны, тышы бла бирге тартылгъан 300 грамм лимонну, 1-2 бек уллу болмагъан ууакъ тууралгъан шибижини къатышдырыб, юсюне 0,5 литр аракъы къуюб, юсюн басдырыб, къарангы джерге салыб 10 кюнню тутаргъа керекди. Андан сора сюзюб, кюнюне юч кере ашарны аллы бла 30 такъыйкъаны алгъа уллу къашыкъ бла бир ичиледи. Ичген сагъатда ауругъан джерине джагъаргъа да болады. Ичерге тыйыншлысы бир айды. Бир айдан сора 10 кюнню солуб дагъыда ичиб башларгъа боллукъду. Бу суусунну ашхынында ауругъаны болгъаннга, баууру, бюреги ауругъаннга, сылтаулу тиширыугъа, сют ичирген анагъа  ичерге болмайды.

* Сарысмакъ бла алма сиркесуудан этилген джик ауруулагъа джарагъан суусун (тышындан джагъылгъан).

7-8 сарысмакъ тишни ууакъ туураб, юсюне 0,5 литр алма сиркесуу къуюб, 100 миллилитр аракъы къошуб, иги къатышдырыб, юсюн басдырыб къарангы сууукъ джерге салыб, юч ыйыкъны, къатышдыра-къатышдыра, тутаргъа керекди. Андан сора сюзюб хайырландырыб башларгъа боллукъду. Адам ауругъан джерине джакъса, аурууун сындырлыкъды, сууугъун аллыкъды, сингирин созгъаннга да джарарыкъды.

* Сарысмакъ бла лимондан этилген джик ауруугъа джарагъан суусун.

4 сарысмакъ бла бек уллу болмагъан 4 лимонну (тышы бла, сюеклерин ариулаб) ууакъ этиб бир-бирине къошуб, юсюне бир литр къайнагъан суу къошуб, башын джабыб бир кюнню тутаргъа керекди. Экинчи кюн сюзюб, кюнюне 3 кере ашарны аллы бла 30 такъыйкъаны алгъа 50-шер миллилитр ичерге керекди.

Байчораланы Алина джарашдыргъанды.

 
{jcomments}