Байрамукъланы Халимат атлы Къарачай-Черкес кърал миллет библиотекада, къарачай халкъны кёчгюнчюлюгюне аталыб, кёб тюрлю джыйылыу бардырылады.

- Халкъыбызны ёмюрлюк джашагъан джуртундан Орта Азия бла Къазахстанны къум тюзлерине элтиб атханлы быйыл абыстол (ноябрь) айны 2-де 75 джыл толады. КъЧР-ни кърал миллет библиотекасында озгъан ёмюрню къыркъынчы джылларында болгъан бу къыйынлыкъ бла байламлы арт кёзюуде кёб иш этилгенди. Аланы бириди «Халкъымы джарасы» деген тарих бла байламлы дерс. Аны Джёгетей Аягъы шахарны 1-чи номерли лицейини сохталары къурагъандыла, - деб хапар айтханды библиотеканы къуллукъчусу.

Дерс библиотеканы къуллукъчулары хазырлагъан «Память не знает забвения» деген фильмден башланнганды. Бу фильмде къарачай халкъгъа джетген къыйынлыкъны юсюнден айтылгъан бла бирге миллет, не къыйын болумда да бел къатдырыб, анга салыннган сынаудан сый бла ётгени айтылады.

- Фильмде кърал миллет библиотеканы, КъЧР-ни телевидениесини фондларында болгъан документле, архив материалла, документли эмда суратлау кинофильмледен кадрла, алимлени, политиклени ол бушуу кюнлени юслеринден айтханлары орун табхандыла, - деб къошханды ол.

Къарачайны бушуу кюнюне аталгъан джыйылыугъа келгенлеге библиотеканы къуллукъчулары «Горы помнят, но молчат» деген суратлау-китаб кёрмючню да теджегендиле.

Аны бла да къалмай, Черкесск шахарны 2-чи номерли школуну сохталары бла «Къара ноябрь 43» деген мероприятие да бардырылгъанды. Ол да халкъыбызны кёчгюнчюлюкге атланнганыны 75-джыллыгъы бла байламлы болгъанды. Библиотеканы къуллукъчулары сохталагъа къарачай халкъ кёчгюнчюлюкде кёрген ачлыкъны-джаланнгачлыкъны, ёлюм къыйынлыкъны хакъындан хапар айтхандыла.

Бу тюбешиуге келгенлени ичинде Орта Азия бла Къазахстанда джашагъанла, ол кёзюуде миллетге джетген учузлукъну, зорлукъну кёзлери бла кёргенле да болгъандыла. Ала билген, сынагъан затларындан ёсюб келген тёлюге хапар айтхандыла. Тамада тёлю сохталагъа тарихибизни билирге, кёчгюнчюлюкде ёлгенлени унутмай, эсге тюшюрюрге кереклисин эсгертгендиле.

 (БИЗНИ КОРР.).