Байчораланы Магометни джашы ДауутКъызыл Аскерге 1939-чу джыл чакъырылгъанды. Аскер къуллугъун Воронеж областда тындыра тургъанлай, къазауат башланады. Уллу Ата джурт къазауат башланнганындан бошалгъынчы урушлада айланнганды. Къазауатны биринчи джылында Къыбыла-Кюнбатхан фронтну тизгинлеринде сермешиулеге къошулгъанды. Андан сора Сталинград ючюн баргъан ачы согъушлада, сапёр взводха башчы болуб, джигитлик этгенди. Былайда кёргюзгён тирилиги, ётгюрлюгю ючюн, анга кърал саугъа да берилгенди. Бу тёгерекден гитлерчилени сюрюб къыстагъандан сора, Байчора улуну взводу Ленинград, Прибалтика фронтланы сафларында къазауат этгенди.
Ленинград областны фашистледен азатлагъан сагъатда 52-чи инженер-сапёр батальонда Байчора улу башчылыкъ этген сапёр взвод, Эресейни маданиятыны байлыгъын сакълар ючюн, уллу къыйынын къошханды. Взводу Пушкин атлы шахарны ичи, тёгереги, Пушкин атлы таула, Михайловское элни эсгертмелерине, элни тёгерегине фашистле салгъан мингле бла миналаны къоратыб, тин байлыкъны чачылырындан къутхаргъанды. Андан сора да, Псков шахарда кёб юйню, Тарту шахарда университетни мекямларын, миналадан ариулаб, къоркъуусуз этиб, оюлурларындан сакълагъанды.
Прибалтика фронтну тизгинлеринде Байчора улу кесини взводу бла Латвияны, Литваны, Эстонияны гитлерчи фашистледен азатларгъа къошулгъанды.
Урушлада, сермешиуледе кёргюзген тирилиги, батырлыгъы ючюн Байчораланы Дауут Къызыл Джулдузну эки, Ата джурт къазауатны I-чи, II-чи дараджалы орденлери бла дагъыда талай медаль бла саугъаланнганды.
Теуналаны Шаулухну джашы Борис1914-чю джыл Огъары Марада туугъанды. 1924-чю джыл 2-чи классны бошагъандан сора урунуу джолу башланады. 1937-чи джыл тири джашны Къызыл Аскерде къллукъ этерге ашырадыла. Ол 126-чы атлы дивизияда къуллукъ этиб башлайды. Тогъуз айны къол пулемётха юрениб, ызы бла 367 мараучу полкда махтаулу къуллукъ этиб турады. 1940-чы джыл а, аскер къуллугъун бошаб, юйюне къайтады. Алай а къазауат башланыб, 1941-чи джыл фронтха кетеди. 117-чи мараучу полкну бёлюмюню командири болуб, сержант Б. Теуна улу урушха киреди.
Аны фронтда партиягъа да аладыла. 1942-чи джыл Казачий Курганда баргъан сермешиуде этген джигитлиги ючюн «Ётгюрлюгю ючюн» медалгъа тыйыншлы болады. Бюгюнлюкде кърал аскер архивде быллай къагъыт сакъланады. «Приказ №51н 117 стрелковому полку 23 Краснознамённой и ордена Ленина стрелковой дивизии Донского фронта 16 декабря 1942 года от имени Президиума Верховного Совета Союза ССР Награждаю медалью «За отвагу» командира отделения пулемётной роты 117 стрелкового батальона сержанта Теунаева Бориса П. 8 декабря 1942 г., в бою за высоту Казачий Курган огнём своего пулемёта уничтожил 18 гитлеровцев и подавил огонь 3 огневых точек противника. 1914 года рождения, член ККП(б), русский, призван в РККА Микояновским РВК Ордженикидзевского края. Домашний адрес...»
Ол урушдан сора Борис, бир айдан башына окъ тийиб, ауур джаралы болуб, госпиталгъа тюшеди. Аны бла ол саугъасын къолуна алалмай къалады. Иги кесек заманны госпиталда джатады. Эс джыйгъанында, саулугъу амалтын башына бош этедиле. Адамларына къайтханында, ол къыйын джыллада къадалыб урунады. Орта Азияда 1946-чы джыл «Урунууда джигитлиги ючюн» медалгъа да ие болады.
Теуналаны Борис урушлада, ачы сермешиуледе этген тирилиги, джигитлиги ючюн дагъыда Ата джурт къазауатны II-чи дараджалы ордени бла, «За Победу над Германией 1941-1945г.г.» эмда Уллу Хорламны юбилей медаллары бла саугъаланнганды.
Рубриканы СЕМЕНЛАНЫ Аминат бардырады.
{jcomments}
