Къочхарланы Хаджи-Исхакъны джашы Абул бла Чотчаланы Къодуну къызы Эркехан бир юйдеги къурагъандан сора эллеринден (Тёбен Марадан) Даусуз элге кёчюб барадыла. Абул бла Эркехан, колхоз да болушуб, къадалыб, юй ишлейдиле Абулну юйлендириб, айырыб чыгъаргъан заманда Хаджи-Исхакъ, джашына ёгюзле да, атла да, аланы джегерге арбала да бергенди. Къолунда улоуу болгъан Абул юй ишлеген заманда алай бек да джунчумагъанды.. Абул чегет мюлкню агъашчысы болады. Эркехан а юй джумушларын этеди. Алай бла эки джаш адам, къадалыб уруна, джашаб башлайдыла. «Атамы юйдегисинде эки джаш бла бир къыз бар эдиле. Анабыз 1943-чю джылны джайында ауушхан эди.
Атам 1942-чи джылны апрель айындан башлаб Тау Артында урушлада болгъанды. Немчала Къарачайдан хорланыб кетген заманда атам 15 кюннге отпускагъа келген эди юйге. Былай келгенлей, районнга чакъырадыла да: «Коммунистсе, агъашчы болуб ишлеб тургъанса ал джыллада, районну джерин-сууун да иги билесе, энди, немчала чачыб кетген колхозну  мюлкюн ызына джыйыб, аякъ юсюне сал, коммунистча!» - деб, эл Советни председатели къуллукъгъа саладыла. Къачда уа Къазахстаннга кёчюредиле.
Алай бла юйдегибиз, барыб, Къазахстанны Джамбул областыны Чуй районунда Ленин атлы колхозуна тюшген эди. Ары баргъанлай, атам бизге юй сатыб алады. Эгечим Аминат сют-товар фермада ийнек саууучу болады, мен да ол фермада тууарчы болама. Атам а, колхозну къурулуш ишчиси болуб, агъач усталыкъны къолгъа алады. Алай бла фермада 5 джылны ишледим тууарчы болуб. Андан сора мюлкню председатели, мени фермадан алыб, джерчилик санагъатха кёчюрдю. Колхозну сабанларында кёб тюрлю битимле ёсдюре эдиле, артыкъсыз да шекер чюгюндюр иги битимли бола эди. Мени учётчик этиб салдыла. 3 джылны ишледим. Кюнлени биринде колхозну тамадасы, Борисни правлениеге чакъырады  да: «Сени ишлегенинге бир айыбым джокъду. Алай а, кесинг да кёре болурса, бусагъатда къазауатдан кёб адам сакъат болуб къайтханды. Алагъа да иш берирге керекди. Сенича, тёрт саны сау адам башха ишни да баджараллыкъды. Аны ючюн учётчикликни аланы бирине берирге, сени уа арбачы бёлекни звено башчысы этерге излейбиз», - дейди. Ол ишде да 2 джыл урунады Борис. Андан сора шофёр болуб да 1,5 джыл ишлейди.
Кавказгъа къайтыргъа мадар табылгъанында Къочхар улу, келиб, алгъыннгы элинде, Хуса-Къарданикде, орналады. Алай бла 1958-чи джыл Джуккаланы Хуштурайны къызы Шамкъызгъа юйленеди. Алагъа бир джаш бла эки къыз тууадыла.
4-5 джылны Хуса-Къарданикде (Колонка да дегендиле ол элге) школ-интернатда объездчик болуб тургъанды. Артда интернатны джабадыла. Къочхар улу да Зеленчук станседе Ленин атлы колхозну сют-товар фермасында ийнек саууучу аппаратланы джарашдырыучу уста болуб, 18 джылны махтаулу ишлейди. Къартлыкъ солуугъа да алайдан чыгъады.
Пенсиягъа чыкъса да, юйге кириб къалалмайды. Элинде этилиб бошалмагъан ишле аны тынгысыз этиб турадыла. Ётген джылланы эсге тюшюре, Борис былай айтады: «Элибиз бир кёзюуде афендисиз тургъан эди. Дин башчыла болумну сюзюб, башха мадар болмагъанында, меннге ол ишни теджейдиле. Джамагъатыбыз да аллай оноугъа разы болгъанында, мен да «хо» болама. Андан бери ол ишни айыбсыз тындырыргъа кюрешгенлей келеме. Элге къайгъырыб ишлеу адамгъа кёбчюлюкню аллында бек джууаблы джумушду.
Межгитге тюшген ачхагъа эл къабырланы тёгерегине буруу ишлегенбиз. Адамлагъа, джаназыгъа сюеле турургъа деб, къашпакъ ишлер умутда, аны къурулуш кереклерин межгитни къатына джыйыб турабыз. Джаз джылыу келе эсе, ишлер муратлыбыз».
Ол затладан тышында да, «Къарачай - алан халкъ» деген регионал джамагъат организацияны Зеленчук районда бёлюмюню къурамындады Борис. Ол, организацияны оноууна къошулгъанлай, бойнуна салыннган аманатны тындыргъанлай, джамагъатха джарар джанындан болуб, кесини оюмун, тилегин да айтханлай турады. Сёз ючюн, элден Уллу Ата джурт къазауатха кетиб, бири да юйюне къайтмай къалгъан 38 адамны кимле болгъанларын билиб, алагъа мемориал къанга салыргъа тыйыншлыгъа санайды да, Даусузда эл Советни башчысына тилегин айтады, ол да ишни тындырады. Алай бла элчи джигитлени атлары халкъны эсинде ёмюрлюкге сакъланырча болады. Аладан сора да кёб джамагъат ишлеге къошулады Къочхар улу.
Ауаз берген заманында да, байрамлада,  эл джыйылыулада сёлешсе да, джамагъатны биригирге, халал урунуу бла республикабызны экономика халын кючлю этерге, аманлыкъ ишлеге къаршчы сюелирге чакъыргъанлай турады.
«Борисни юй бийчеси Шамкъыз ауушханлы 14-15 джыл болады (Аллахны рахматында болсун). Борис а, юч баласы бла 32 туудугъуна къууана, джашы бла келинини  биргелерине рахат джашайды. «Къуш уяда нени кёрсе, учханда аны этер» дегенлей, тюз иннетли, адебли, кеси къыйыны бла джашагъан ата бла анадан туугъан Борисни къанында болгъан асыллыкъ аны ашхы ишле этерге учундургъанлай келеди джашауунда.
 
СОЗАРУКЪЛАНЫ Норий.
 
{jcomments}