Бу кюнледе Эресей Федерацияны Миллет гвардия аскерлерини федерал къуллугъуну Къарачай-Черкес Республикада управлениесини тамадасыны заместители, КъЧР-де Эресей гвардияны шкок, окъ, сауут дагъыда ала кибик затланы къураргъа эркинлик берген къагъыт бла баджаргъан эмда аланы хайырландырыргъа эркинлик берген джумушланы хакъындан аралыкъны (Центр лицензионно-разрешительной работы) тамадасы Чомаланы Ансарны джашы Эдуард журналистле бла тюбешгенди.

Джыйылыуда управлениени арт алты айны ичинде этген эмда управлениени къуллукъчуларыны аллында салыннган борчланы, сауут джюрютюрге излеген адамланы арасында бюгюнлюкде тюбей тургъан джарсыуланы юслеринден хапар айтды.
- Бу арт джыллада тюрлю-тюрлю сауут къураргъа излегенлени саны кюнден кюннге ёсе барады. Аланы кими джанына къоркъуусузлукъгъа, кими уугъа барыр ючюн дагъыда башха чурумла бла управлениени бу бёлюмюне келгенлей, электрон халда да джазгъанлай турадыла. Адамгъа сауут джюрютюрге эркинлик берир ючюн аны къолунда талай къагъыты болургъа керекди. Андан сора да, ол законнга тартылмагъанына шагъатлыкъ этген къагъыт да амалсыз керекди. Ала бла байламлы тинтиу-соруу ишлени бардырыучу бёлюм барды. Керекли соруула ачыкъланнганларындан сора да, джорукъ сакълагъан органладан аланы бегитген шагъатлыкъ документ да джазылады. Къысхача айтсам, законну излемине кёре джорукъланы бузмай ишлерге керекди, - деди Чомаланы Эдуард. – Дагъыда, башында сагъынылгъаныча, законну ол излемине тийишген къагъытлары джарашхан адамлагъа мадар барды кеслери излегенлерича сауут-шкок къураргъа.
Чома улу айтхандан, джыллары 18-ден башлаб атылгъан сауут эмда уучу шкок къураргъа, джыллары 21-ден башлаб, андан абадан къауумгъа да сауутну бирси тюрлюсюн джюрютюрча эркинлик бериледи. Аны бла да къалмай, эркишиге, тиширыугъа да бериледи аллай мадар. Ол адам къаллай сауут алыргъа излегенине кёре  окъуу учреждениени да джокъларгъа кереклисин чертиб айтды аралыкъны тамадасы.
Джыйылыуда Чома улу джюрютген сауутха документни джарашдырмагъан, лицензияны болджалы озгъан дагъыда законну бузгъан бирси чурумла бла байламлы джарсыуланы юслеринден да айтды. Аны иш отчётундан: КъЧР-де Управлениени шкок, окъ, сауут дагъыда ала кибик затланы къураргъа лицензия бла баджаргъан эмда аланы хайырландырыргъа эркинлик берген (ЛРР) бёлюмлеринде 2019-чу джылны аллындан бери регистрациягъа бютеулей да 21 минг бла 647 сауутну иелери тюшгендиле. Джылны ичинде къуллукъчула сауут къоллу болгъан адамланы джашагъан джерлерин аулаб, 13 мингден аслам тинтиу иш бардыргъандыла. Ол кёргюзюмню ичинде джорукъну бузгъан 1204 адам административ джууабха тартылгъанды. Аны бла да къалмай, «Сауут бла тюз хайырланыуну юсюнден» законну бузгъан неда бирси ачыкъланнган бузукъланы чурумлары бла байламлы бир мингден аслам сауут иелеринден сыйырылгъанды, бир къауумуну уа лицензиялары бла эркинликлери тыйылгъанды. Дагъыда сауут джюрютюрге излеген 5600 адамдан ЛРР аралыкъны тамадасыны атына электрон халда тилек джазылгъанды.
Эресей гвардияны КъЧР-де управлениесини тамадасыны заместители Чомаланы Эдуард джыйылыуну аягъында журналистлени кёб тюрлю сорууларына джууаб берди.
БОКАЙЛАНЫ Фатима.
 
{jcomments}