Ассалам алейкум, багъалы ахлуларым!
«Къарачай» газетибиз джылдан, джылгъа аламатдан аламат бола барады. Къарачай газетни 1959-чу джыл атам джаздыргъан эди. Андан бери мен да джаздыргъанлай турама. Ол заманда газетибиз «Ленинни байрагъы» деб чыгъа эди. Къарачай тилде биринчи кере окъугъан газетим а Къазахстанда болгъан эди. Сталин ауушханындан сора къарачайлылагъа бир элден башха элге барыргъа эркинлик берген эдиле. Биз Джамбул областны Мерке районуну Краснооктябрьское элинде джашай эдик. Ыйых кюнледе атам бла анам дагъыда башха элчиле Къыргъызияны район  аралыкъ элине, Чалдоваргъа, базаргъа  барыучан эдиле. Бир кюн базардан келгенлей атам мени да, уллу къарнашымы да чакъырыб: «Чабыгъыз орамладан къарачайлыланы чакъырыгъыз!» –  деб ашырады бизни. Миллет джыйылады арбазыбызгъа. Атам къарачай тилде басмаланнган газетни кёргюзюб элчилеге окъуду. Къарачайлыла газетни бир-биринден алыб окъуб, тепсей эдиле, джырлай эдиле. Ол кюнча, атамы алай къууаныб кёрмеген эдим. Ол газет Къыргъызияда Фрунзе шахарда басмаланнган эди, 1955-чи джыл болур эди?
1978-чи джылдан бери уа мен Медногорский посёлокда джашайма. Газетибизни хар джыл сайын джаздырама. СССР-ни заманында бир 15 къарачай юйдеги джашай эдик мында. Бусагъатда 60 фатар чакълыда джашайдыла къарачайлыла. Алай а 5-6 адам джаздырады газетибизни. Къартлагъа да, джашлагъа да урушама: «Нек джаздырмайсыз?!» – деб. Почтабыз ишлейди, заманында келтиредиле газетибизни.
Арт джыллада газетибизни сыйы бек уллу болгъанды. Тарихибизни юсюден, джигитлерибизни юсюнден газетлени туудукъларыма окъуйма. Къаллай бир джигитлерибиз барды! Адам санына кёре Къарачайдан  кёб джигити болгъан Шимал Кавказда къой, саулай къралда да болмаз.
Анамы юч къарнашы къазауатда уруш этгендиле. Уллу къарнашы Мамаланы Халит фин къазауатда болгъанды, 1939-чу джыл а Брест къалагъа кёчюрюлген эди. Немца фашистле бла ачы къазауатда ауур джаралы болуб, I-чи группалы сакъатлыкъ табханында, Кавказгъа ашырадыла. Эки гитче къарнашы Хочалай бла Абул-Керим а Краснодар крайны джерлеринде баргъан урушлада ёлгендиле. «Книга памяти» деген китабда табхан эдим аланы юслеринден къысха хапарларын. Атамы да эки гитче къарнашы Байрамукъланы Аббас бла Осман къайда тас болгъанларын, ай медет, табалмагъанма. Ала Хурзукдан кетген эдиле къазауатха.
Ма быллай джигитлерибизни хапарларын «Къарачай» газетде окъусам, мен бек ёхтемленеме. Ёхтемленир затларыбыз дагъыда кёбдюле. Аланы билир ючюн «Къарачай» газетни хар къарачай юйдеги алыргъа керекди. Мен 80-дан атлаб баргъан бир кишиме. Халкъым, Аллах бла тилейме, ана тилибизни, тарихибизни, маданиятыбызны унутуб къоймаз ючюн «Къарачай» газетни джаздырыб ала туругъуз.
Салам бла,
БАЙРАМУКЪЛАНЫ
Аубекир.
Уруп район, Медногорский посёлок.
 
{jcomments}