Гитче Къарачай районда "Первомайский" аграр колледжде "Право и организация социального обеспечения», «Экономика и бухгалтерский учёт (по отраслям)», «Земельно-имущественные отношения», «Компьютерные сети», «Физическая культура», «Гостиничное дело» деген усталыкълагъа окъуйдула.
Быладан сора да талай къошакъ усталыкъладан билим аладыла студентле. Сёз ючюн, «Организация фермерского хозяйства» деген къошакъ усталыкъны да аладыла. Мындан алда «Къарачай» газетни корреспонденти Къобанланы Махмут «Первомайский» аграр колледжни директору Гочияланы Аубекирни джашы Ахматха тюбеб ушакъ этген эди да, аны окъуучулагъа теджейбиз.
- Первомайский аграр колледжни тарихинден, бюгюннгю кюнюнден бир хапар айтсагъыз.
- «Первомайский» аграр колледж бизни республикада орта усталыкъ берген эм эски окъуу заведениелени бириди. Бир-эки джылдан бу окъуу заведение къуралгъанлы 90 джыл боллукъду. Мен а мында директор болуб 2000-чи джылдан бери ишлейме. Совхоз-техникумну къыйын заманлары кёб болгъандыла. Артыкъ да бек Совет Союз чачылыб, Эресей кеси бир кърал болгъан заманда бу окъуу заведениени хайыры джокъду деб, джабаргъа да аз къалгъан эдиле.
Ол джыллада окъугъан студентле да кёб эдиле: 600-700 бар эдиле. Кюреше кетдик да джабдырмадыкъ. Зоотехниклени, ветеринарланы хазырлагъан хайырлы тюл эсе дедик да, бюгюннгю заманны излемине келишген усталыкъланы алдырыргъа кюрешдик студентлеге. Алай бла джангы бёлюмлени ачдыкъ. Бюгюнлюкде аграр колледжде 210 студент окъуйду. Къайда да бусагъатда компьютерле бла ишлейдиле. Эм алгъа компьютерде ишлей билген усталаны хазырлаугъа уллу эс бёлдюк. Бюгюнлюкде школлада физкультурадан дерслени бардыргъан устазла джетишмейдиле. Ол затны эсге ала, «Физическая культура» бёлюмню да ачдыкъ.
Аграр колледжде белгили спортчула кёбдюле. Кесибизни уллу спорт залыбыз барды. Джашла эркин тутуш бла дагъыда спортну башха тюрлюлери бла да кюрешедиле. Теория джаны бла аланы бир кесек хазырласакъ школлада физкультурадан дерслени бардырыб тебрерча устала болуб къаладыла. Экономистле-бухгалтерле не заманда да керекдиле да, аланы хазырлагъан бёлюмле да ишлейдиле.
Баш муратыбыз неди десегиз, студентлеге терен билим бериудю. Бюгюнлюкде терен билимлери болмагъан усталаны ишге киши аллыкъ тюлдю. Ол зат аграр колледжге да сый келтирлик тюлдю. Не да этиб, студентлеге терен билим берирге кюрешебиз. Алай этерге мадарыбыз да барды. Аграр колледжде терен билимлери, уллу сынамлары болгъан устазла кёбдюле.
Студентлени саулукъларына да уллу эс бёлюнеди. Аланы асламысы тогъуз классны бошасала келедиле бизге окъургъа. Ол кёзюуде спорт бла кюреширге бек сюедиле. Эркин тутушха, дзюдогъа, каратэге, волейболгъа дагъыда башха спорт секциялагъа кёб сабий джюрюйдю. Районну школларында окъугъан джашчыкъла бла къызчыкъланы да аграр колледжни тюрлю-тюрлю спорт секцияларына сюйюб алабыз. Нек десегиз, бюгюн ала бизни аграр колледжни студентлери тюл эселе да, тамбла бизде окъургъа боллукъдула. Эртде огъуна окъуу заведениебизни юсюнден хапарлы болуб къалсала игиди.
Бюгюнлюкде аграр колледжде спортну устасы деген атны джюрютген бир студент барды. 15 студент а спортну устасына кандидатладыла. Биринчи разрядланы джюрютген спортчула уа кёбдюле. Аграр колледжде спортну кёб тюрлюсюнден эришиуле болгъанлай турадыла. Мындан алда уа республиканы элчи спортчу джашчыкълары бла къызчыкъларыны арасында джайгъы спорт оюнла бардырылгъан эдиле. Ала спортну 10 тюрлюсюнден эришген эдиле.
- Аграр колледжде окъугъанла къолларына дипломларын алсала, аланы иш бла баджарыргъа кюрешемисиз?
- Биз къолларына дипломларын алгъан джаш адамланы сансыз этиб къоймайбыз, ишге джарашдырыргъа кюрешебиз. Тюрлю-тюрлю предприятиеле, учреждениеле бла байламлылыкъ тутуб, аланы къуллукъчуларын кесибизге чакъырыб, студентле бла танышдырабыз. Студентле аграр колледжни бошаб чыкъсала, келишиуле этген предприятиелеге барыб, ишлеб башлайдыла.
Быйыл арттотур (апрель) айны 14-де, аграр колледжде окъуу джыл бошалмагъан эди, Гитче Къарачай районну орта школларында окъугъан, алай а быйыл 9-чу, 11-чи классланы бошай тургъан 700 окъуучуну чакъыргъан эдик къонакъгъа. Алагъа окъуу заведениебизни юсюнден толу хапар айтхан эдик.
Бюгюнлюкде хар сабийни да мадары джокъду юйюнден узакъгъа кетиб билим алыргъа. Аланы асламысыны аталары-аналары ишлемейдиле, ачхасыздыла. Тышына барыб окъур ючюн а иги кесек ачха керек боллукъду. Ачхалары болмагъанла, бизни аграр колледжге кириб, орта усталыкъ аладыла, спорт бла кюрешедиле. Бизни аграр колледжни эшиклери кимге да ачыкъдыла. Ол себебден, бизде окъугъан студентле, орта усталыкъ алгъан бла къалмай, спорт бла кюрешиб, анда да онглу джетишимле этерге боллукъдула, - деб бошады ушагъыбызны Гочия улу.
