Аджиланы Аубекирни джашы НазимНазим 1920-чы джыл Учкуланда туугъанды. Атасы Аджиланы Къойчуну джашы Аубекирни 1934-чю джыл Микоян-Шахарда ишлерге ашыргъанлары себебли, аланы юйдегилери ары кёчгендиле. Алай бла Назим 1936-чы джыл рабфакга окъургъа киргенди. Аны 1939-чу джыл айырмагъа бошаб, устазла хазырлагъан институтда окъуб башлагъанды. Спортха энчи эс бёлгенди. Уллу джетишимлеге да джетгенди. 1939-чу джыл Ставрополь шахарда баргъан спорт эришиулеге, Къарачайны командасы бла барыб, биринчи болуб, чемпион атны да алгъанды. Ол, институтну джетишимли тауусуб, кърал экзаменлеге хазырлана тургъанлай Ата джурт къазауат башланнганды. Къазауатны биринчи кюнюнде ол студент тенглери бла аскерге барыргъа къагъыт джазгъанды. Аладан кърал экзаменлерин алгъаракъ алыб, дипломлары бла бирге къазауатха повестка да бериб, никкол (июнь) айны 27-де фронтха ашыргъандыла.
Назим Моздок шахардагъы джаяу полкга тюшюб, пулемётчу болуб, къуллукъ этиб башлагъанды. Ростов шахардан узакъ болмай, Генеральский мост стансени къатында, 168-чи Укрепрайонну сафында фашистле бла сермешиуге киргенди. Ол урушда ётгюрлюк да танытханды. Аскерчилени башларындан окъ-тоб атыб, тенглерин къырыб баргъан «Юнкерсге» дерт къайтарама деб, пулемётундан атыб башлагъанды. Алайда дертин да къайтара, самолётну агъызгъанды.
Урушну джоллары аны Армениягъа да ётдюргенди. 1942-чи джыл 61-чи дивизияны къурамында Краснодар ючюн баргъан сермешиуледе уруш этгенди. Алайда биринчи кере джаралы да болуб, Сочи шахарда госпиталгъа тюшгенди. Госпиталдан чыкъгъандан сора 1943-чю джыл 111-чи атыучу бригаданы пулемётчусу болуб фронтха кетгенди. Аскер бёлеклери фашистле бла сермеше Туапсеге джетгендиле. Андан сора Новороссийскеге джууукъда, Гитче Джерге, Мыс Хано джарым айрымканнга, ашыргъандыла. Анда ачы сермешиуледе этген джигитлиги ючюн, ол «Ётгюрлюгю ючюн» медаль бла саугъаланнганды. Кеси да джаралы болуб госпиталгъа тюшгенди. Госпиталдан сора Аджи улу Назим 55-чи гвардиячы атыучу дивизияны сафында взводну командирини болушчусу болуб къазауатха киргенди. 1943-чю джыл абыстол (ноябрь) айда Керчь ючюн уруш этген аскер бёлекге ашыргъандыла. Джигит пулемётчу мында да ётгюрлюгюн танытханды. Бизни аскерчилени башларын кёлтюртмей тургъан немец пулемётлагъа къысыла барыб къаушатханы ючюн, Къызыл Джулдузну орденине тыйыншлы кёргендиле. Алай а джигит пулемётчик джаралы болуб, госпиталгъа тюшгенди.
1944-чю джыл Азов тенгизни къатында баргъан сермешиуледе да уллу джигитлик кёргюзгенди Назим. Архивде сакъланнган саугъалау къагъытда былай джазылады: «Во время высадки десанта в Керченский полуостров в район высоты 115,5, тов. Аджиев находясь в передовых рядах нашей пехоты участвовал в отражении контратаки пехоты противника, при этом из автомата им было уничтожено 5 офицеров и солдат противника.
В бою 11.01. 44 года при прорыве немецкой обороны, тов. Аджиев в составе группы бойцов и командиров первыми прорвали оборону и соединились с частями Красной Армии… достоин Правительственной награды ордена «Красного Знамени».
Назим Ата джурт къазауатны I-чи эмда II-чи дараджалы орденлери бла да саугъаланнганды.
1944-чю джыл аскер бёлеклеринде болгъан башха таулу джашла бла бирге Назимни фронтдан алыб Иванов областха агъач кесерге ашыргъандыла. Алайда 1946-чы джылгъа дери ишлегенди. 1947-чи джыл Джамбул областда Къара Тауда джашагъанды. 1949-чу джыл Джамбул шахарда школда ишлей тургъанлай, шахарны футболдан «Динамо» командасына алгъандыла.
Туугъан джуртуна, юйдегиси бла, 1957-чи джыл къайтханды. Къарачай шахарда 3-чю номерли школда ишлеб тургъанды. Назим къазауатны эмда урунууну ветераны болгъанды. Ол устазлыкъ ишине кертилигин таныта 40-дан аслам джылны ишлегенди.
Аджиланы Къойчуну джашы Аубекирни юч джашы да - Назир, Билял, Назим - къазауатда фашистле бла уллу джигитлик танытыб сермешгендиле. Назир Сталинград ючюн баргъан къазауатда джан бергенди.
Рубриканы СЕМЕНЛАНЫ Аминат бардырады.
{jcomments}
