Адам бир ишни къолгъа алыб, эринмей, бардырса, ол аны чегине джетеди, устасы болады эмда андан ары аны айнытханлай турады. Бир-бир чемерле уа бир иш бла чеклениб да къалмайдыла, санагъатны тюрлю-тюрлюлеринде кеслерин сынайдыла. Бизни миллетде да бардыла аллай адамла. Аланы хар тындыргъан джумушларына къарасанг, сейир-тамаша боласа: бу муну къалай ишледи, эсине да къайдан келди, дейсе.Аллай адамладан бири Тёбен Чегемде туугъан, алгъаракъладан бери уа Прохладна шахарда джашагъан Габоланы Асланны уланы Мусабийди. Мен аны бла эртдеден бери шагъырейме. Ол таулуланы арасында алтын бла кюрешген биринчи устады. Озгъан ёмюрню 80-чы джылларында, Нальчикде университетни суратчылагъа юретген курсларын бошаб, сувенирле этген цехде урунуб тебрейди. Анда, адам мени кёзюмден кёрюб тут деб, берирге джараулу саугъала ишлейдиле.
Алгъыннгы къралыбызны узакъ джерлеринден келиб, бу тийреледе солугъанла аллай саугъаланы сюйюб алгъандыла. Уллу мюйюзледен этилген саугъаланы уа белгили адамлагъа теджегендиле. Мусабий ишлеген мюйюзле тыш къраллада огъуна бардыла. Ол санда Американы тёрт штатыны губернаторларында. Бизни республикагъа келген космонавтланы къауумуна да аллай саугъала берилгендиле.
Бир кере уа Габо улуну къолуна, узунлугъу метр бла къыркъ сантиметр болгъан джугъутур мюйюз тюшеди. Ичинде шобрасын кетериб, тазалаб, тышын да ариу этиб, сыйдамлаб джарашдырады. Аны кёбле джаратадыла, ие болургъа да излейдиле. Алай а уста аны эм белгили джашланы бирине, Залийханланы Хусейге, берген эди. Андан сора да, бир сейирлик мюйюзню джарашдырыб Къулийланы Къайсынны саугъалагъанды. Артда Чингиз Айтматов джаратыб, алыб кетгенин айтхан эди Къайсын.
Уста адам дайым алгъа атларгъа учунады. Мусабий да хунерлигин андан да ары ёсдюрюр муратда алтын, кюмюш ишлеге кёчеди. Тиширыулагъа джюзюкле, сыргъала, бууунлукъла эмда башха омакъ, багъалы затла ишлейди. Бу ишде да Мусабий усталыкъны эм мийигине джетгенди.
Ненча саугъа хазырлагъанды ол, аны санаб айтхан къыйынды. Къудайланы Мухтарны юбилейин белгилеген сагъатда, Мусабий кесине уллу алтын джюзюк этиб, бармагъына салыб баргъан эди. Уллу хурметини белгисича, байрам ингирде аны къолундан алыб, Къудай улугъа бериб кетгени да кёблени эслериндеди.
Нальчикде алтын иш бла кюрешиб тебрегенинде, Прохладнада аллай уста керек болады да, джашны ары иедиле. Анда да ол джумушун юреннгенича тынгылы бардырады. Андан тышында да джаш адамланы усталыгъына юретеди. Ол санда къызы, джашы, эгечинден-къарнашындан туугъанла да бардыла. Алагъа деб Прохладнада цех да къурагъанды, кеси уа ишни къоюб, пенсиягъа чыкъгъанды.
Алай а урунургъа юреннген къолла тынч турмайдыла. Мусабий энди тоханалагъа ушагъан шиндикле этиб тебрегенди: эмен, чынар къангаладан, къулакълары уа джугъутур, гаммеш, кийик мюйюзледен. Аладан эм уллусуну къулакълары марал мюйюзледендиле. Алагъа шкок, къама, башлыкъ, къалпакъ тагъылыбдыла. Эркиши уудан, джортууулдан келсе, аланы ары илиндириб къояды. Ол шиндикни кёргенле анга нартла башчысы, Ёрюзмекни тоханасы, дейдиле. Мусабий анга да огъай демейди. Алай а кавказ тауланы арасында мийикликлери беш минг метрден артыкъ болгъан тауланы атларын атаргъа деб турады. Къайсысында тохтаргъа арсарлыды.
Шиндик болгъан джерде хант тепси да болургъа керекди. Уста аны сагъышын да этгенди. Узунлугъу эки метрден артыкъ базыкъ мияланы алыб, анга аякъланы орнуна марал мюйюзлени орнатханды. Ол да кесича бир сейирлик затды. Аланы барын да бир джерге джыйышдырсанг, нартла оноу этген отоугъа ушарыкъ болур эди.
Башында айтылгъан ишле бир кюнню, бир айны ичинде болмагъандыла. Мусабий бу затла бла кюрешиб келгенли быйыл къыркъ джыл толады. Ол а иги кесек заманды. Аллай бир джыл уруннган адам ишни къоюб, кесин солуугъа берсе да айыбы джокъду. Болса да ол, иш кёллю адам, излемни джолундады. Биринчи болуб нарт шиндикле ишлеген киши, джууукъ заманда энтда да бир джангы чыгъармасы бла бизни сейирсиндирир, деб сакълайбыз.
Османланы Хыйса.
Нальчик ш.
Нальчик ш.
{jcomments}
