«Очаг добра» деген сууаблыкъ аралыкъ къарт, сакъат адамлагъа солургъа, булджургъа мадар берирге, болушлукъ этерге къуралгъанды. Аны «Къарча» деген къарачай миллетни тин, иннет, маданият джанындан эмда адеб-намыс тазалыгъын ёсдюрюуге, айнытыугъа  себеблик, джакълыкъ этген фонд бла къартлагъа, сакъат адамлагъа къайгъыргъан «Самира» деген сууаблыкъ фонд къурагъандыла.

Эки фонд да бирлешиб, Черкесскени Первомайская орамында, энчи юйде, ачхандыла ол аралыкъны. Анда бек къарт адамлагъа, ауругъанла бла сакъатлагъа, бек къарыусуз джашагъанлагъа, башха чурумланы юслери бла кеслерине ушхууур эталмагъан къауумгъа ашарыкъ хазырлаб бередиле. Алайгъа келир къарыулары болмай, ауруу инджитиб тургъан адамланы да юйлерине джылы, дамлы хантладан 20-30 «юлюшню»  элтиб бередиле волонтёрла. Кеслери келиб ашагъанла уа 40-гъа джууукъ адам боладыла.

Андан сора да, ауругъанлагъа укол этген, капельница салгъан дегенча эмда башха тюрлю медицина болушлукъланы да хакъсыз этедиле аралыкъда. Андан тышында да, ауругъан, къарт адамлагъа транспорт болушлукъ да этиледи. Алай демеклик, адамланы керекли къагъытларын джарашдырыб, автобуслары болгъан автопаркланы тамадалары бла келишиб, проездной билетле алыб бередиле волонтёрла. Ол затладан тышында да, адвокатланы контораларында сёлешиб, келишиб, аладан да керекли болушлукъ хакъсыз табылырча этедиле.

 Адамлагъа солургъа, хунерликлери бла фахмулукъларын кёргюзюрге да таблыкъла къурагъандыла ол аралыкъны тутхан Ижаланы Норийни къызы Эльвира бла Каппушланы Людмила. Сёз ючюн, аралыкъда китаб окъургъа сюйгенлеге керекли китабла бардыла, телевизор къурулубду, хант юйде да джумушакъ шиндикле салыныбдыла. Халкъ усталыкъла бла кюреширге, юренирге излегенлеге суратла салыргъа, оюула салыб, юслерин да тюрлю-тюрлю гануа халыла бла тигерге юретген кружокла къуралгъандыла. Къайишден, агъачдан, ала кибик башха затладан, чемерликлери болгъан устала, адамлагъа джараулу юй керекле этерге юретедиле тырмашханланы. Этилген затланы сатылгъанлары болса, ол ишлени багъалары этгенлени кеслерине къаллыкъдыла.

Кюнорта азыкъ ашаргъа къайсы бир миллетни келечиси да барыргъа боллукъду.

Аралыкъда тамада шапа Мариям бла аны болушчусу Фатима хар кюн сайын ишлейдиле Аллахны разылыгъы ючюн. Тиширыу волонтёрладан бир-бирлерин ауушдура, кёбле ишлейдиле.

«Ингирде аууз ачаргъа келгенлени кесим сыйлаб ашырыб тургъанма», - дейди Загъаштокъланы Тенгиз. Ала бары да ораза тутхан, намазгъа ийилген муслиманладыла. Аланы тепсилерине хар ингир сайын джангы биширилген эт шорпа, кёгетле, тюрлю-тюрлю суула, сют шай эмда шекер шай, суусаб, татлы хантла, эки тюрлю ётмек бла салатла салына эдиле. Кюнорта азыкъны ашаргъа келгенле бла ингирде аууз ачаргъа келген адамланы бирге санаб айтсакъ, аланы саны 80-дан 100-ге дери джете эди. Алагъа теджелген хант "юлюшлени" саны да 40-дан 50-ге дериси эркишилеге, аллай бир да тиширыулагъа. Былайда энтда бир затны чертиб айтыргъа тыйыншлыды. Ол да неди дегенде, бу сууаблыкъ иш башланнганлы энчи тюкенлери болгъан муслиманла, хакъсыз, кеслери  сатхан халал ашарыкъ затладан - сютбашы, джау-бышлакъ, нарзан, татлы суула, кёгетле, конфетле дагъыда башха татлы затла - келтириб бередиле аралыкъгъа. Волонтёрладан  5-6 эркиши (джаш адамла) кюн сайын келиб, джумуш этиб турадыла. Аланы ичинде Орусланы Хасанны, Загъаштокъланы Тенгизни, Чотчаланы Шамилни, Джашеланы Муратны, Семенланы Ибрагимни, Ижаланы Исламны, Къоркъмазланы Расулну эмда  башхаланы атларын бюсюреу бла айтыргъа тыйыншлыды. Сау болсунла, аллай уллу ишленмекликлери болгъан, адебли, болумлу къарачай джашла. Аланы къайгъырыулары къартланы джашаугъа джангыдан кёллендиреди, къартлыкъ келген, ауруулу болгъан кюнлеринде, алагъа муслиман шартла бла этилген тыйыншлы болушлукъ табыллыгъына ышандырады. Барына да Аллахны разылыгъы болсун!

 «Къарча» бла «Самира» фондла этген ишле ораза тутуу бошалгъаны бла тохтаб къаллыкъ тюлдюле,   энтда этиле барлыкъдыла. 

Созарукъланы Норий.

 
{jcomments}