Зеленчук районну ич ишлерини бёлюмюнде Эресейни Ич ишлерини ветеранларыны эмда аскерлерини кюнюне аталыб къууанч джыйылыу бардырылгъанды.
Ветеранланы алгъышларгъа дин бирлешликлени келечилери, район депутатла, полиция классланы сохталары келгендиле. Джыйылыуну Зеленчук районну ич ишлерини бёлюмюню ветеранларыны советини, джамагъат советини председатели, милицияны отставкадагъы майору Батчаланы Мухат ачханды.
Ол джыйылгъанлагъа эмда ветеранлагъа кёб джылы сёз айтды, байрамны магъанасын ангылатды, саулукъ-эсенлик теджеди, бюгюннгю тёлю бла тамада тёлюлени араларындан байламлылыкъ тас болмазгъа кереклисин да эсгертди.
Зеленчукде иш ишлени бёлюмюню тамадасыны болушлукъчусу подполковник Герман Криволапов, районда аскерчилени-интернационалистлени ветеранларыны советини тамадасы Орусланы Назбий, Зеленчук муниципал районну советини депутаты Чауушланы Ислам дагъыда башхала сёлешдиле.
Байрам джыйылыуда 30-дан аслам ветераннга эмда ич ишлени къуллукъчуларына республиканы Ич ишлерини министерствосуну, Халкъ Джыйылыууну, Ич ишлени район бёлюмюню грамоталары берилдиле. Зеленчук районну ветеранларыны советини грамоталары бла школланы директорлары эмда сохталары саугъаландыла.
