КъЧР-ни джамагъат ишлерине тири къошулгъаны эсге алыныб, Алийланы Умар атлы Къарачай-Черкес кърал университетни экономика бла башчылыкъ этиу факультетини деканыны орунбасары Ёзденланы Ибрагим КъЧР-ни Башчысы Темрезланы Рашидни Бюсюреу къагъытына тыйыншлы болгъанды. 

Ибрагим «Джаш донорну халкъла арасы кюню» деген проектни координаторуду. Ол кеси да бёлек джылдан бери ауругъанлагъа себеблик этер иннет бла къан бергенлей келеди. Айтыргъа, ол сынамы болгъан ашхы донорланы тизимине киреди.

«Биз къан тёкмейбиз, адамланы джанларын къалдырыр ючюн, къаныбыздан юлюш этебиз», - деген сёзлени лозунг болгъанларын кёзюбюз бла кёргенбиз. Бу лозунг сынгар Шимал Кавказгъа къой эсенг, бютеу Эресейге да джайылгъанды. Бу сёзлени автору Ёзденланы Ибрагимди. Биринчи болуб бу лозунгга ол къанат бергенин бюгюнлюкде Къарачай-Черкес Республиканы джаш тёлюсю ёхтемлениб чертерге боллукъду.

Алайды да, Ибрагим, донор болгъан бла да къалмай, бу асыл ишге башхаланы да алландырады, къан бериб, кесини энчи юлгюсю бла къалгъанланы да ол затны этерге чакъырады.

- Адамланы тёгерегине джыйыб, алагъа ауаз бергенден эсе, бир бош игиликни этиб, аны юсю бла хайыр келтирирге боллугъун кёргюзген ашхыды, - дейди Ёзденланы Ибрагим. – Къыйын болумгъа тюшгеннге болушлукъ этгенден иги иш не болур дунияда! Адамгъа эм багъалы зат аны джашаууду. Алайды да, къан керекли адамла дуниядан замансыз кетмез ючюн, мадарлары болгъанла кеслерини къанларындан юлюш этерге борчлудула. «Адам къатында адам ёлмейди» деб, миллетде бош айтылмайды.

Ибрагим, джаш болса да, кесини ашхы ишлери бла атын джаш тёлюню арасында кенг белгили этгенди. Аны сёзюне тынгылайдыла, ол кёргюзген ашхы джол бла барыргъа разылыкъларын танытханла аз тюлдюле.

Ёзденланы Магометни джашы Ибрагим Гитче Къарачай районну Первомайское элинде туугъанды. 2004-чю джылдан бери джамагъат ишлеге таукел узалгъанлай келеди.

2011-чи джылдан башлаб, ол «Джаш донорну халкъла арасы кюню» - «Кавказчы донор» деген республикан донор акциягъа башчылыкъ этеди.

Ибрагим 2014-чю – 2016-чы джыллада «Машук», 2011-чи – 2015-чи джыллада «Махар» деген Бютеуэресей эмда халкъла арасы джаш тёлю форумлада республикадан баргъан делегациялагъа башчылыкъ этгенди эмда аланы къурамларында болгъанды.

2005-чи джыл Уллу Ата джурт къазауатда Уллу Хорламны 70-джыллыгъына аталыб, аны башламчылыгъы бла  Минги Тауну кюн батхан тёппесине чыкъгъандыла. Аланы алларында, айхай да, Ёзден улу кеси баргъанды. Аны бла да къалмай, ол джыл огъуна Берлинде «Рейхстагны аллында Хорламны кюню» деген флешмобну да къурагъанды Ибрагим.

Алайды да, аны башчылыгъы бла Алийланы Умар атлы кърал университетни устазлары бла студентлери, Берлиннге барыб, Рейхстагны аллында дуниягъа белгили «Хорламны кюню» деген джырны джырлагъандыла.

«Аллах, берсе, эки къолу бла береди» дегенлей, Ибрагим кёб зат бла кюреширге къолундан келген фахмулу таулу уланды. Алийланы Умар атлы кърал университетде «Архыз» деб тау спорт клуб ишлейди – аны модератору  Ибрагимди. Алайгъа Ёзден улу бош тюшмегенди, ол спорт бла гитчелигинден бери кюрешеди, альпинизмден ючюнчю разряды болгъаны да ол затны бегитеди.

Ибрагим 2015-чи джылдан бери спортну тау тюрлюлеринден ючюнчю категориялы сюдюдю.

Университетни экономика бла башчылыкъ этиу факультетинде деканны орунбасары болуб 2015-чи джылдан бери ишлейди. Ол юретиу ишлеге джууаблыды, анга салыннган борчну да бет джарыкълы толтуруб келеди.

«Игини игилиги джугъар» деб, халкъда бир ашхы сёз барды. Ибрагим джаш тёлюге кесини иги, ашхы иннетин сингдиреди, энчи юлгюсю бла алада адамлыкъ шартланы уятады. Джашлыкъны керексиз, кёзбау затлагъа джоймай, керти файдалы ишле бла кюреширге кереклисине тюшюндюреди. Аны ючюн сыйы уллуду, анга адамла ышанадыла, аны ызындан джол саладыла, аны бла тенглик тутадыла. Алай эсе уа, Ибрагим насыблыды.

Рубриканы Мамчуланы Дина бардырады.