«Синергия» университетни Къарачай-Черкесияда орналгъан филиалыны студент совети кесини ашхы ишлери бла белгилиди. Арт эки джылда анга Шаманланы Ахмадияны джашы Исмаил башчылыкъ этеди. Ол кесин къураучулукъ хунери болгъан джаш адамча танытханды. Болумлу, ачыкъ кёллю, иги окъугъан Исмаилны студентле сыйын кёредиле, аны тёгерегине сюйюб джыйыладыла.

Шаман улу джаш адамланы бирикдире билгенин кёргюзгенди, аны бла бирге ол, студентлени джамагъат джумушха къошуллукъларын излеб, аланы алларында тюрлю-тюрлю борчланы салады. Ала аны айтханын джерге тюшюрмейдиле.

Айтыргъа, Исмаилны башламчылыгъы эмда башчылыгъы бла университетде кёб джыйылыу бардырылады: бу баш окъуу заведениени тауусханлагъа багъышланнган къууанч ингирле, студентлеге къошулгъанланы алгъышлау джыйылыула, илму конференцияла, форумла. Ол бютеу къууанч джыйылыуланы кеси бардырыучанды, илму конференциялада да айырылыб тирилик танытады.

Исмаил спортха уллу эс бёлген джашланы бириди – ол тюрлю-тюрлю спорт эришиуледе ёчлю орунлагъа ие болгъанлай келеди.

Анга, институтну махтаууду деген, уллу джангыллыкъ тюлдю. Исмаилны сураты «Синергия» университетни Махтау къангасында тагъылыбды. Аны республиканы тюрлю-тюрлю джамагъат организацияларыны башчылары да иги таныйдыла. Джаш тёлюню ичинде ол белгили гуждарланы бириди. «Синергия» университетни джергили филиалыны излемлерин джакълай, ол Къарачай-Черкес Республиканы Правительствосуна дери джетгенди. Бизни республиканы баш окъуу заведениелерини кеслерине башчылыкъ этиу бла байламлы бардырылгъан съездлерини ишлерине таукел къошулгъанлай келеди.

Аны башы, ангысы таймаздан ишлегенлей турадыла, ол кёб тюрлю оюмну-фикирни авторуду, аланы башха студентле джаратыб, джашаугъа сингдирир джанындан кюрешгенлерин да чертерге тыйыншлыды. Айтыргъа, аны башламчылыгъы бла талай иш этер муратлыды республиканы джаш тёлюсю.

Исмаил волонтёр къозгъалыугъа башчылыкъ этгенли эки джылдан аслам заман болады. Башха баш окъуу заведениелени студентлери бла бирге сабий юйлеге-интернатлагъа, къартла, сакъатла тургъан аралыкълагъа баргъанлай, сууаблыкъ ишлеге къошулгъанлай турады.

Ол баджаргъан ишине джууаблы кёзден къарайды. Ма ол шарты ючюн, тутхан ишин аягъына дери джетдиреди. Волонтёр къозгъалыугъа тири къошулгъан таулу уланнга волонтёрланы «Доброград» деген Бютеуэресей слётларында «20 лет добровольчеству на Кавказе» деген медаль берилгенди.

- Бу медаль меннге берилмегенди. «Синергия» университетни Къарачай-Черкесияда орналгъан волонтёр къозгъалыууна берилгенди, - дейди намыслы улан.

Айхай да, бу къозгъалыуну хар бир атламы, хар иши Шаман улу бла байламлыды. Джыл сайын Джангы джылны аллы бла сакъат сабийлени аралыгъына барыб, алагъа саугъала да бериб, концерт да кёргюзюб кетиу «Синергияны» студентлерине адет болгъанды.

2018-чи джылны аягъында да джокълагъандыла «Синергияны» волонтёрлары сакъат сабийле тургъан аралыкъны. Исмаил ары Буз Акка болуб баргъанды, студентле сабийлени къууандырыб, кёзлерин ачыб кетгендиле.

Джамагъат ишле Исмаилны кёб заманын алгъанлыкъгъа, иги окъургъа чырмау болмайдыла. Ол айырмагъа окъугъан студентди. Университетни администрациясы баш окъуу школланы араларында бардырылгъан форумлагъа, джыйылыулагъа аны ышаныб иеди – ол бет чыгъарыб къайтырыгъын биледи. Адамланы ышанмакълыкъларына толу болгъан джаш баргъан джеринден къуру къайтмайды – не командасыны башчысынача, неда кесине энчи халда ёчле бериб ашырадыла.

Бизни республикада джаш тёлю бла байламлы джумушлагъа къатыша келген таулу джаш кёб тюрлю грамота, диплом эмда бюсюреу къагъыт бла саугъаланнганды. Анга шагъатлыкъ этген бир юлгю келтирейик. 2019-чу джыл башил (январь) айны 25-де Къарачай-Черкес Республиканы туризмини,курортларыны эмда джаш тёлю политикасыны министри Эриккенланы Анзор анга 2018-чи джыл джаш тёлю бла байламлы ишлеге тири къошулгъаны ючюн разылыгъын билдиргенди.

«Аллах берсе, эки къолу бла береди» дегенлей, Шаманланы Исмаилны иги окъугъанындан, джамагъатха болушургъа хазырлыгъындан сора да ариу халиси болгъанын чертерге дурусду. Ол халкъыбызны бурундан келген адетлерин тутхан, адебли, намыслы уланды. Къыйын кюнде ким да анга ышаныргъа боллукъду – къолундан келген болушлукъну кишиден да къызгъанныкъ тюлдю.

Алайды, бизни джаш тёлюбюзню арасында башхалагъа юлгюге айтырча, келир кюнде миллетибизге, джуртубузгъа дагъан болурча джашланы, ёсюб келгенлери миллетибизге уллу насыбды.

 

Рубриканы МАМЧУЛАНЫ Дина бардырады.

 
{jcomments}