Бюгюннгю джарсыуларыбызны талайы, ай медет, экология бла байламлыды. Адамла бусагъатда экология къоркъуусузлукъгъа бек уллу эс бёлгенлерин черте, коммунал багушла бла болум къолай болмагъаны айтылады РФ-ны Президентини Федерал Джыйылыугъа этген Чакъырыуунда.

Кёб джерде полигонлада онла бла джылланы къаланыб, тауча сюелген багушланы кёрмегенча этиб турургъа боллукъ тюлдю мындан ары. Бютюн да бек адамла джашагъан джерледен узакъ болмай орналгъан полигонланы ол халда тургъанларын кёрмегенча этген тамадалагъа къаты айтылады Чакъырыуда. Багушну къоратханлары ючюн багъаны кёлтюрген бла ишни битгеннге санаб къоядыла бир къауум оноучула. Не да этиб бу санагъатда мизамны, джорукъну къолгъа алыргъа кереклисин айта, Владимир Путин граждан контролгъа, джамагъат инспекторлагъа джол берирге кереклисин билдиргенди. Ахыры эки джылны ичине шахарлагъа джууукъ джерледеги «джарсыулу багушладан» 30-ну, алты джылны ичине уа къалгъанланы джокъ этерге деб борч салгъанды ол. Багушну джарашдырыуну (обработка отходов) 8-9 процентден 60  процентге дери джетдирирге керекди. Бу ишге джаш тёлюню тири къошулурун да излегенди Президент.

«Биз энди келлик тёлюлеге таза, кирсиз къралны берирге керекбиз. Алай этер ючюн, аны табигъат байлыгъын, заповедник фондун сакъламасакъ боллукъ тюлдю», - дегенди Президент. Аны бла бирге Дагъыстанда, Комиде, Саха (Якутияда), Алтай крайда, Челябинск областда быйыл джангы миллет паркла ачыллыкъларын да билдиргенди. Чакъырыуунда кърал башчы, заповедниклени сагъына, табигъатха къарагъан министерствогъа заповедниклени бютеу барына кадастр ревизия этиб чыгъыгъыз деб, къаты аманат салгъанды. Дагъыда экология туризмни айнырын излегенди ол.

Ай медет, бизни республикада  да тюбейдиле экология бла байламлы джарсыула. Коммунал багушла эл, шахар тёгерекледе эркиндиле. Президент Владимир Путин айтханча, джорукъ, мизам къаты этилмеселе, джууаблылыкъ ёсерик тюлдю. Республикада багушну джарашдыргъан комбинат болмагъаны да бек джунчутады. Ишлерге деб аны юсюнден сёлешиб тургъанлы ненча джыл болады. Эшта, Чакъырыуда айтылгъан излемле бир къауум чиновниклени джукъудан уятырыкъ болурла.

 

   Ёзденланы Якъуб.

 

 
{jcomments}