Гитчеликден адеб-намыс къалада ёсген, ана тиллерин мардасыз бек сюйген адамланы ичлериндедиле Акъбайланы Харунну къызлары Аминат бла Халимат. Ала 1996-чы джыл Джангы Джёгетейде туугъандыла. Айырмагъа окъуб, 2014-чю джыл школну алтын медаллагъа бошагъандыла.

- Ана тилден устазыбыз Байрамукъланы Алима Асхатовна, миллетин бек сюйгени себебли, сохталарына да ол сюймеклигин берирге кюреше эди, - дейдиле къызчыкъла. - Аны дерслерине биз бек сюйюб бара эдик.

Бу эки къызчыкъны насыблары уллуду, ала адеб-намыс, миллетге, аны тарихине уллу сюймеклик не болгъанын гитчеликлеринден биледиле. Аланы аталары Акъбайланы Харун белгили филологду, журналистди. Ана тилин сюйген, аны тамбласына уллу сагъыш этген адамды. Аналары - Венера. Бу тиширыугъа къарасанг, машалла, керти да ма быллай болургъа керекди таулу тиширыу дериксе - намыслы, адебли, таза иннетли. Быллай ата бла анадан туууб, берекетли юйдегиде ёсюб, эшта, Аминат бла Халиматны башха тюрлюле болургъа мадарлары да болмаз эди.

- Биз хар заманда да биле эдик ишибизни ана тил бла байларыгъыбызны, - дейдиле эгешчикле. - Гитче заманыбыздан юйде да, школда да башха тиллени къошмай, таза сёлеширге юреннгенбиз.

Аминат бла Халимат, школну бошагъандан сора, 2014-чю джыл Къарачай-Черкес кърал университетни филология институтуну къарачай эмда ногъай кафедрасына кириб, быйыл, Аллах айтса, окъууларын тамамларыкъдыла. Беш джылны ичинде ала университетде тюрлю-тюрлю мероприятиелеге къошула, кеслерини терен билимлерин, ишленмекликлерин кёргюзе келген къызладыла. Ана тил бла байламлы бир джыйылыу да ётмейди бу эки джаш адамсыз.

Ала, айырмагъа окъугъанлары бла къалмай, къарачай-малкъар тилде кёб окъуйдула, Халимат кеси да назмула джазады.

Ала республикада биринчи болуб къарачай-малкъар тилде ётген «Акъылман» деген телевизион оюннга къошулуб, финалына дери бирге баргъан эдиле. Анда, мен уллу эгечим бла эриширик тюлме деб, Халимат артха тургъанды. Керти тау адетни кёргюзген юлгю! Эгеч, къарнаш, уллу, гитче айыра билген, сый бере билген - къалай бек багъалыды бюгюнлюкде. Барыбыз да билгенден, Аминат «Акъылман» деген оюнда хорлаб, аны баш саугъасын – машинаны - алгъан эди. Къызчыкъны хорламына саулай миллет бирден къууаныб, кёб алгъыш сёз айтылгъанды аны ёсдюрген атагъа-анагъа.

- Бурундан да тиширыуну иши сабийле бла байланыбды, - дейдиле Аминат бла Халимат. - Бюгюннгю джашау бла къарасакъ, устазлыкъ иш, таулу къызгъа эм келишген усталыкъланы бириди. Сабийлени джашау къарамларын, дуния ангыларын къурарыкъ юйлеринде ата-аналары бла бизле - устазлабыз. Артда джашауларына, сайларыкъ санагъатларына да, башха учуннган затларына да бизни айтханыбызны юсю бла къарарыкъдыла. Къарачай-малкъар тилни сайлагъаныбыз да анданды. Тилибизни быллай къыйын кёзюуюнде, сабийлеге ана тиллерин сюйдюрюрге, аны юсю бла аланы адетлерибизге джууукълашыргъа болушаллыкъ къуру да устазладыла, деб келеди кёлюбюзге.

Аминат бла Халимат ариу биледиле: ана тилни айнытыр ючюн, сабийле бла гитчеликден кюреширге керекди. Аланы не джаны бла да Ата джуртларына, ана тиллерине сюймекликлерин ёсдюрюр ючюн, бу эки къыз, университетни бошагъанлай ишге барлыкъдыла, ана тиллерине сюймекликлерин сабийлеге сингдирликдиле. Ышанабыз, бу эки къыз окъутхан сохтала миллетлерин, тиллерин, джуртларын сюйген адамла боллукъларына.

Рубриканы МАМЧУЛАНЫ Дина бардырады.