Уллу Ата джурт къазауатны окъ-тоб тауушлары тохтагъанлы 74 джыл чакълы болду.

Немча-фашист аскерлени къаушатыб, Уллу Хорламны Байрагъын алыб келгенлени да, Ата джуртлары ючюн джанларын бергенлени да этген джигитликлери, сыйлы атлары унутулмай, тёлюледен тёлюлеге кёче, джашаб турадыла. Алагъа тыйыншлы эсгертмеле салыннгандыла, энтда салынныкъдыла. Этген джигитликлери уа къралыбызны тарихинде ёмюрлюкге сакъланныкъдыла.

Джыл джылдан ол ачы къазауатда болгъан бизни аскерчилерибизни адам санлары седирей, азая барады.Уллу Ата джурт къазауатны биринчи кюнюнден ахыр кюнюне дери джаула бла сермеше, аны отлу джолларындан сау-саламат ётгенлени бири болгъанды Огъарытебердичи Хубийланы Абдулланы джашы Хасан.

1940-чы джыл, алкъын 18 джылы да толмагъан Хасанны аскерге чакъырадыла. Къуллугъун махтаулу баджара, Хасан, миномётну джерлеучю усталыкъгъа толу юренеди.

Уллу Ата джурт къазауат башланнганында Хубийланы Хасан ачы сермешледе джигитлик танытады.

1941-чи джыл СССР-ни Гъарб фронтунда, 1943-чю эмда 1944-чю джыллада Беларусь фронтда этген джигитликлери ючюн а, Баш командованиени кърал саугъаларын алады. 1944-чю джылда Ётгюрлюк орден бла, 1945-чи джылда уа Къызыл Джулдузну ордени бла саугъаланады. Дагъыда 1945-чи джылда  «За взятие Варшавы» деген орденнге да тыйыншлы болады.

Фашизмни кюркесини – Рейхстагны - къабыргъаларына къызыл-аскерчи джашла джазгъан чакъырыу сёзле бла къол салыу ызла, бютеу совет халкъ саулай къазауатны узагъына ашыгъыб сакълагъан Уллу Хорламны келгенин белгилей эдиле. Хубийланы Хасан да аллай джазыу бла уллу къууанчын билдиргенлени бири болгъанды. Кесин да ол Хорлам ючюн Махтауну III-чю дараджалы ордени бла саугъалайдыла.

1945-чи джыл башил (январь) айны 29-да Совет Аскерле, уллу джигитликле эте, Германияны чеклеринден хорламлы ётгенлери ючюн, джигитлени ичинде Хубий улу Хасан да Баш командованиеден Бюсюреу къагъыт алады. Варшаваны фашистледен азатларгъа къошулуб, этген ётгюрлюгю ючюн берилген Бюсюреу къагъытында уа былай джазылгъанды: «За участие в героическом штурме и освобождении Варшавы Указом Президиума Верховного Совета СССР красноармеец Хубиев Хасан Абдуллаевич награждён медалью «За освобождение Варшавы». Аныча медалны, Хубий улу, Берлинни азатлаугъа къошулгъаны ючюн да алгъанды.

Хубий улуну аскер къуллугъу 1946-чы джылгъа дери созулгъанды. Ол джыл Хасанны гюнахсыз халкъы сюргюн болуб, гитче Ата джуртундан зор бла чыгъарылгъанлы 3 джыл толгъан эди. Ол кюн Хубий улуну Баш командованиени атындан «За Победу над Германией в Великой Отечественной войне 1941-1945 г.г.» деген медаль бла саугъалагъандыла.

Арадан джылла озуб, 1985-чи джылны алтотур (март) айыны 11-де, СССР-ни Президиумуну Баш Советини буйругъу бла, Хубий улу Хасан Ата джурт къазауатны II-чи дараджалы ордени бла саугъаланнганды.

Ол къанлы джыллада санларын-джанларын да къазауатны отуна салыб, бизни бюгюннгю чууакъ кюнлерибизге, джарыкъ джашауубузгъа къууаныб турурлай насыбны бергенлени атларын унутмазгъа борчлубуз.

 

Гочияланы Аскер,

Исхакъланы Габзай.

 
{jcomments}