Кърал къуллукъда борчларын толтуруб, джетишимле этиб, атларын айтдырыб тургъан уланларыбыз кёбдюле. Артыкъсыз да бек джаш адамланы арасында эшитсек аланы атларын кёлюбюз кёлтюрюледи, бек къууанабыз.

Аллай ашхы адамла ёсюб келген джаш тёлюге юлгюдюле.

Алайды да, Къарачай-Черкес Республикада Росгвардияны шкок, окъ, сауут дагъыда ала кибик затланы къураргъа эркинлик берген къагъытла бла баджаргъан эмда аланы хайырландырыргъа эркинлик берген ишлени хакъындан бёлюмню (лицензионно-разрешительный отдел) тамадасыды Бердиланы Леонтийни джашы Исмаил. Ол джаш болса да кесини ишин толу биледи.

Бердиланы Исмаил 1983-чю джыл Ставрополь шахарда туугъанды. Сабийлиги, джашлыгъы да Джёгетей Аягъында ётгенди. 1990-чы - 2000-чи джыллада  Джёгетей Аягъы шахарны 1-чи номерли школунда орта билим алгъанды. Исмаил сохталаны арасында алчы сабий болуб окъугъанына аны алтын медалгъа тыйыншлы кёргенлери шагъатлыкъ этеди.

Берди улу, орта школну тауусхандан сора, Дондагъы Ростовда юристлени хазырлагъан институтну Нальчик шахарда орналгъан бёлюмюне (милиция школгъа) окъургъа киреди. 2002-чи джыл аны тауусханында Исмаилгъа лейтенант чын бередиле. Андан сора Ич ишлени Черкесск шахарда тинтиу бёлюмюне дознаватель болуб джарашады. Алай бла кърал къуллукъну джолларында биринчи атламларын этиб башлайды. Берди улу ишлей тургъанлай Эресейни МВД-ны Краснодар шахарда академиясына кириб, баш билим алыб чыгъады.

Алай бла ич ишледе 4 джылны ишлегенден сора, аны Черкесск шахарда участковый къуллукъгъа саладыла. Ол ишде Берди улу кесин билимли, ишине джууаблы болгъанын танытыб, атын айтдыргъанды. Андан сора аны 2011-чи джыл участковыйлени бёлюмюне тамадагъа сайлагъандыла. Алайда да юч джыл ишлегенинден сора 2014-чю джыл Исмаилны Росгвардияны Черкесскеде лицензион-эркинлик къагъыт берген шахар бёлюмюне тамада этгендиле. Иши тынч тюлдю. Бюгюнлюкде уугъа чыгъыучуланы саны кюн сайын къошула баргъаны хакъды. Алай болса да, Берди улу айтхандан, аланы хар бирини да сауут джюрютюрге эркинлик берген къагъыты джарашмагъанды. Ол затлагъа бир къауум адам эс бёлюрге да излемейди. Аллай сансызлыкъ аланы башларына къайгъы келтирирге боллукъду.

Исмаил джумушу бла аллына келген хар адамгъа да кереклисича ангылатады, юретеди. Хар адамны да кёлюне джетиб бармакълыкъ бек къыйынды. Алай болса да кесини ишин сюйген адамгъа не ауур джумуш да къыйын кёрюнмейди. Ишини юсюнден Бердиланы Исмаил кеси былай хапар айтады:

- Бусагъатда тюрлю-тюрлю сауутла къураргъа излегенлени саны кюнден кюннге ёсе барады. Аланы кими джанына къоркъуусузлукъгъа, кими уугъа барыр ючюн, дагъыда башха чурумла бла келгенлей турадыла бизге. Адамгъа эркинлик къагъыт берир ючюн аны къолунда талай документи болургъа керекди. Андан сора да, ол законнга тартылмагъанына шагъатлыкъ этген къагъыт да амалсыз керекди. Ала бла байламлы тинтиу-соруу ишле да бардырабыз. Соруула барысы да ачыкъланнганларындан сора да, джорукъ сакълагъан органладан аланы бегитген шагъатлыкъ документ да джазылады. Къысхача айтсам, законну излемине кёре джорукъланы бузмай ишлерге керекди. «Кимге эркинлик бериледи шкок, бычакъ эмда бирси сауут бла хайырланыргъа?» - деб адамла кёб сорадыла бизни бёлюмде къуллукъчулагъа. Мени айтырым, башында сагъыннганымча, законну ол излемине тийишген къагъытлары джарашхан адамлагъа мадар барды излегенича сауут къураргъа. Андан сора да джыллары 18-ден башлаб атылгъан сауут эмда уучу шкок къураргъа, 21-ден башлаб андан ары абадан къауумгъа да бирси тюрлюсюн джюрютюрча эркинлик кимге да бериледи.

Сёз ючюн, мындан алда бизге 87 джыл болгъан бир къарт келген эди, ол огъай эсенг тиширыуланы арасында да аслам болуб барадыла сауут къураргъа сюйгенле. Аланы хар бирини да кесича бир чуруму болгъанына сёз джокъду. Алай демеклик, ол адамны къолунда дохтурладан - нарколог, психиатр, невролог дегенча врачладан - саулугъуну бирси джаны бла къыяуу болмагъанына шагъатлыкъ этген къагъыты болса лицензия алыргъа тынчды. Анга кёре биз да тинтиу ишле бардырыб, башында чертгенимча, кертиси бла да ол адам сауут бла хайырланса башхалагъа къоркъуу боллукъмуду деген нюзюр бла да къарай, сора хар неси да тыйыншлысыча келишсе, лицензияны алай беребиз. Юйлеринде не атасы, неда баш иеси сау замандан бери тургъан шкокланы лицензиялары джокъ эсе, ала бла да хайырланыргъа джарамайды. Аны амалтын алагъа да айтырым, бюгюнлюкде аллай адамла кеч этмей, къайгъысын этселе, тамбла кюн кеслерине джарар.

Ол айтхандан, тыш джуртлада джашагъан адамладан эсе бизни республикада джашагъанланы арасында кёб тюбейди сауут тутаргъа излеген адамла. Артыкъсыз да бек бизни миллетде, хазна къалмай, хар юйдегиде сауут, къама тутхан бурундан келген адет болгъаны себебли ол затлагъа уллу къоркъуулу кёзден къарамайдыла.

Бердиланы Исмаил ишине толу берилген, арымагъан, талмагъан адам болгъаны себебли биргесине ишлегенле да аны сыйын иги кёредиле. Ол иш сынамын ёсдюрюрге тышында шахарлагъа да баргъанлай турады. Талай кере кеси эмда коллективи республикан дараджада бардырылгъан спорт эришиулеге да къошулгъандыла.

Хар неде да алчы бола, ол адамладан, къралдан да бюсюреу табханлай турады. КъЧР-ни Ич ишлерини министерствосу, Правительствосу эмда Халкъ Джыйылыуу (Парламенти) талай кере Махтау къагъыт бла да саугъалагъандыла  Исмаилны. Аны бла да къалмай, Росгвардияны Шимал Кавказ федерал округда, Москвада бёлюмлерини тамадаларындан да талай кере Махтау къагъыт алгъанды. Бердиланы Исмаил джууаблы къуллугъунда джетишимле этгени ючюн юч медаль бла саугъаланнганды. Бюгюнлюкде Берди улу джаш адам болса да полицияны подполковнигиди.

Кърал къуллукъдан сора да джаш абычар юйдегисине болушургъа да заман табханлай турады. Ол юй бийчеси бла бюгюнлюкде юч джашны ёсдюреди. Анасы бла атасы анга сингдирген намысны, адебни, башха ашхы шартланы Исмаил да джашларына сингдирирге кюрешгенлей джашайды.

 

Бокайланы Фатима.

 

 
{jcomments}