Къарачай-Черкес Республиканы ёсюмюне айырылыб уллу юлюш къошхан джаш адамланы бири, сёзсюз да, Джанкёзланы Ильясны джашы Эдуардды.

Бюгюнлюкде ол «Группа Прогресс» ООО-ну баш директоруду. Аны бла да къалмай, фахмулу улан «Корпорация развития КЧР» деген АО-ну проектлерини тамада управляющийиди.

Къайда ишлесенг да, тутхан ишинге джууаблы кёзден къараргъа кереклисин иги ангылагъан Джанкёз улу Къарачай-Черкес Республиканы Халкъ Джыйылыууну (Парламентини) депутатыны болушчусуду.

Кёб болмай, «Къарачай-Черкес Республиканы джаш тёлюсюню бирлешлиги» деген джамагъат биригиу къуралгъанды – Джанкёз улу аны члениди.

Айхай да, бир-бирлерин ангылагъан джаш адамла, бирикселе, кёб ашхы иш этерге боллукъдула. Бюгюнлюкде заман бла тенг атлар ючюн, адамны илму-техника джаны бла билими болургъа керекди. Аны бла бирге башламчылыкъ эте билгенле, табышлыла, джашаугъа кеслерини энчи лагъымларын сингдирирге къолларындан келгенле изленедиле. Ол затланы айтханыбыз, Джанкёзланы Эдуард джашауда бюгюн не керек болгъанын, тенгледен артха къалмаз ючюн, кесин джаш адам къалай джюрютюрге кереклисин ангылагъаны бла кесичалагъа юлгю болуб келеди.

Озгъан джылгъа бурулуб къараса, аны джюрегин къууандырырча атламларын да эслерикди. Айтыргъа, Джанкёз улу, 2018-чи джыл «Молодой предприниматель России - 2018» деген Бютеуэресей конкурсну джергили бёлюмюне къошулуб, ёчлю оруннга ие болгъанды. Джаш адамлагъа джораланнган бу конкурсну «Сельскохозяйственное предпринимательство» деген номинациясында анга экинчи орун берилгенди.

Фахмулу, билимли джаш озгъан джыл салат ёсдюрюуден мийик технологиялы теплица комплексни къурулушуну проектине башчылыкъ этгенди. Проектни хазырлаб, ачха келиб башларча болумгъа джетдиргенди – къурулуш ишлеге 500 мелиуандан артыкъ сом керек боллукъду. Эм игиси уа, проект, не тюрлю сынаудан да ётюб, Къарачай-Черкес Республиканы Экономика ёсюмюню министерствосуну инвестицион планына киргенди.

Къарачай-Черкес Республиканы Правительствосу эмда «Корпорация развития КЧР» АО анга ышаннган энтда бир джумушну Эдуард бет джарыкълы тындыргъанын чертерге дурусду. Аны башчылыгъы бла Адыге-Хабль районда дженгил ёсген кёгет терекле орнатыу бла байламлы уллу инвестицион проект джашаугъа сингдирилгенди. Алайды да, 500 мелиуандан аслам сом багъасы 206 гектар джерде кёгет терекле орнатылгъандыла.

Мындан ары да Джанкёзланы Эдуардны регионнга хайыр келтирлик джангы проектлерин сакълайбыз.

 

 
{jcomments}