Байчораланы Халитни джашы Шамил бюгюнлюкде Къарачай-Черкес Республиканы джаш тёлюсюню арасында атын иги бла айтдырыргъа къолундан келген уланланы бириди.

Игиликге-ашхылыкъгъа тырмашхан, атала бла анала алагъа салгъан къыйынны зыраф этмеген джаш адамларыбыз, Аллахха шукурла болсун, джамагъатны ичинде тюбеселе, кёлюбюз, айхай да, кёлтюрюледи.

Байчораланы Шамил Къарачай-Черкес Республиканы Халкъ Джыйылыууну (Парламентини) депутатыны болушчусуду. Ол, Къарачай-Черкес Республиканы Ич ишлерини министерствосуну Джамагъат советини члениди. Алайды да, джамагъат ишлеге таукел узалгъан Байчора улу, джашауда баш магъана адамлагъа игилик-ашхылыкъ этиб, ким да юлгю алырча энчи сокъмакъ салыу болгъанын джашлай ангылагъанды.2018-чи джыл Шамилни джашауунда ашхы ыз къойгъанды. Айтыргъа, тырмашыулу джаш, озгъан джыл медиасферада джаш тёлю проектлени Бютеуэресей конкурсуна къошулуб, биринчи оруннга ие болгъанды.

Билимин таймаздан ёсдюрюрге нюзюр этиб атлагъан таулу улан ётген джыл проект менеджерлени школун да джетишимли тауусханды.

2018-чи джыл Джаш тёлюню ишлерини хакъындан (Росмолодёжь) федерал агентство Эресей бла Японияны джаш тёлюсюню арасында сынам бла алмашыныугъа аталгъан Бютеуэресей конкурс бардыргъанды. Эм игиге саналгъан проект сынам бла алмашыныу программагъа кирликди. Бу конкурсда бизни джердешибиз Байчораланы Шамил биринчи оруннга ие болгъанды.

Озгъан джылда Японияда Эресей бла Японияны джаш тёлюсюню форуму бардырылгъанды. Эресейден ол уллу джыйылыугъа атланнган делегацияны къурамында Байчора улу да болгъанды.

Табышлылыкъ, лагъымчылыкъ ишлеге уллу эс бёлген Шамил «Молодой предприниматель России - 2018» деген Бютеуэресей конкурсну джергили этапында да  кесин танытханды. Аны «Сельскохозяйственное предпринимательство» деген номинациясында анга ючюнчю орун берилгенди.

Кёб болмай тири, билимли, джамагъат ишлеге таукел къошулгъан джаш адамла, биригиб, «Къарачай-Черкес Республиканы джаш тёлюсюню бирлешлиги» биригиуню къурагъандыла. Анда миллетге, джуртха хайыр келтирлик проектлени, ишлени джашаугъа сингдириу бла кюрешир мурат барды. Ол ашхы иннет бла къуралгъан джангы бирлешликни къурамындады Шамил.

Алайды да, алда баргъан джаш адамланы бири болуб, мындан ары да ол кёб ашхы иши бла атын айтдырлыгъына ишек да джокъду.

 
{jcomments}