Мындан алда Къарачай-Черкесияны Доммай посёлогунда Къарны Бютеуэресей кюнюн кенг белгилегендиле. Алайда аякъ чанала бла эришиуле да болгъандыла. 

Ол уллу спорт байрамгъа Къарачай-Черкесияны шахарларындан, эллеринден 200 джаш спортчу, «Мама, папа, я - спортивная семья» деген номинацияда эришген талай юйдеги да къошулгъандыла.

«Къарны кюнюне аталыб бардырылгъан спорт эришиуле бизде ашхы адет болуб бошагъандыла. Джыл сайын анга къошулургъа излегенлени саны ёсюб барады. Ол зат адамланы саулукълу иги джашаугъа тартханларын чертеди. Джыл сайын да этилиб тургъан ол ашхы ишни баш мураты саулукълу джашауну джайыуду. Былайда бардырылгъан ишле, адамланы кёллерин кёлтюрюб, джюреклерине къууанч джайгъанлары хакъды», - дегенди Къарачай-Черкесияны Спорт гимнастикадан федерациясыны президенти Александр Джемакулов.

Къарачай-Черкес Республиканы тау аякъ чаналадан спорт школуну директору Къочхарланы Мусса чертгенден, республикада бусагъатда тау аякъ чанала бла кёб адам кюрешиб башлагъанды. Аланы асламысы джаш адамладыла.

«Бусагъатда адамла спортну бу тюрлюсюн бек сюедиле. Тау аякъ чанала бла кюрешген сагъатда адамны бютеу сингирлери ишлегенлери себебли ол организмге кюч береди. Спортну бу тюрлюсюне джаш адамла терен эс бёледиле, ол бизни къууандырады», - дегенди М. Къочхар улу.

Тау аякъ чанала бла бардырылгъан спорт эришиуле юч тюрлю джылгъы джашчыкъла бла къызчыкъланы араларында баргъандыла. Эришиулеге къошулгъанла джолну терк, тюз барыргъа керек болгъандыла. Орта ауурлукъда эришгенлени араларында эм къызыу баргъан спортчу Диана  Донцова болгъанды.

Кеси айтхандан, ол тау аякъ чанала бла джети джылындан бери кюрешеди.

«Мен эришиулени бек джаратдым. Спортчуланы бары да кючлю хазырланнгандыла. Мен мындан ары да джетишимлерими ёсдюрюрге кюреширикме», - деб хапар айтханды Д. Донцова.

Эришиулени ахыр эсеблери билдиргенден, 18 ёчлю орун белгиленнгенди. Хорлагъанла медалла, грамотала, башха саугъала алгъандыла.

ЛЕПШОКЪЛАНЫ Хусеин.

 

 
{jcomments}