Мындан алда Совет Союзну халкъ артисти Василий Семёнович Лановой аскер-патриот тема бла байламлы джамагъат къуллукъларыны юсю бла Къарчай-Черкесиягъа келген кёзюуюнде, дуниягъа белгили Архызгъа да баргъанды.

Зеленчук районну администрациясыны тамадасы Самоходкин Сергей Иванович бла аны орунбасары Вилков Пётр Андреевич да биргесине болгъандыла. Архыз эл Советни председатели Батчаланы Анзор, школну директору Хубийланы Мухтар, бизнесмен Гедиланы Руслан дагъыда башхала къонакъгъа джылы тюбеб, алгъышлау сёз айтхандыла.

В.С. Лановой «Романтикге» чыкъгъанды, башха джерлеге айланнганды. Архызда джууаблы къуллукъчула бла ушакъ этгенди, аскер-патриот тема бла байламлы ишлени юслеринден хапар соргъанды. Башха затла бла бирге, хар джыл сайын уллу Хорламны кюнюнде «Бессмертный полк» деген джамагъат къозгъалыу къалай озгъанындан аны былайда биринчи къурагъан Хубийланы Мухтар айтханды. Анга къуру элчиле болуб къалмай, солургъа келгенле да къошуладыла. Ол огъай, бир кере кёрюб кетгенле, экинчи джыл кеслерини къазауатда ёлген адамларыны портретлерин алыб келиб, аланы мийик кёлтюрюб, сафда алай барадыла. Сыйлы къонакъ анга бек сейирсиниб, Эресейни узакъ-джууукъ джерлеринден келгенле алай этгенлерине уллу магъана бергенди. Архызны тарих джолуну, алайда къарачайлыла къачандан бери джашагъанларын билгенинде:

- Ариу джерле, ариу адамла, мындан ары да насыблы джашагъыз, - деб алгъыш этгенди. Кесини «Летят за днями дни» деген китабын да саугъагъа бергенди.

Бизде адетдеча, сыйлы къонакъгъа къурманлыкъ этгендиле. Гедиланы Руслан джамагъатны аты бла къарачай джамчы, бёрк кийдиргенди. Бёркню иш этиб «Офицеры» деген фильмдегича тикдирген эди.

(БИЗНИ КОРР.).