Адамлагъа терен эс бёлюб, билимни джолун кенгине ачхан, халкъына игилик излеб джашагъан ашхы тиширыуланы бириди Семенланы Орлону къызы Файзура. Огъурлу кючю халкъына сый келтире, миллетлени арасында шохлукъну, ангыламакълыкъны бегите, ол таукел алгъа барады.

Файзура 1966-чы джыл Сары-Тюз элде туугъанды. Орта школну да мында бошагъанды. 1986-чы джыл Черкесскедеги устазла хазырлагъан училищени айырмагъа тауусханды. Таулу къыз, билим джолда алгъа бара, 1990-чы джыл Ставрополдагъы кърал педагогика университетни «Педагогика и психология» факультетин да айырмагъа бошагъанды. Ол джылдан башлаб, Къарачай-Черкес кърал университетде ишлейди. Устазлыкъ ишин да тыйыншлы дараджада бардыра, студентлеге усталы- гъыны юсю бла дерсле бере тургъанлай, аспирантураны бошаб, 2001-чи джыл «Особенности этнических структур интегральной индивидуальности в период перехода к младшему юношескому возрасту» деген темагъа кандидат диссертациясын джакълаб, психология илмуланы кандидаты болады. Джаш алим 2002-чи – 2018-чи джыллада Къарачай-Черкес кърал университетни психология кафедрасыны тамадасы къуллукъну толтурады. Бу къуллугъу- на тири джюрюш бере, талай ашхы джетишимге ие болады. Файзурагъа 2005-чи джыл доцент ат аталады. Ол Эресейчи психология джамагъат- ны Къарачай-Черкесия- да бёлюмюню да тамадасыды.
Файзура 2011-чи джыл «Психология женской карьеры: личностный и этнический модусы» деген темагъа диссертациясын джакълаб, психология илмуланы доктору атха ие болады. Аны 2018-чи джыл бу университетни психология эмда социал ишледен факультетине декан этиб саладыла, 2012-чи джыл психология кафедраны профессору ат аталады. Файзураны башчылыгъы бла Къарачай-Черкес кърал университетде психологиядан магистратура ачылады. Аны аллай ашхы джетишими кёблеге хайыр, къууанч келтиреди.
Студентле мында кеслерини фахмуларын ачарча, ёсдюрюрча, профессионал усталыкъларыны социал магъанасын ангыларча, этген ишлерине джууаблылыкъларын сезерча мадарла къуралгъандыла. Билимде, саулукъ сакълауда, миллет культурада, спортда, къралны къоркъуусузлугъун сакълауда, юриспруденцияда, адамлагъа социал болушлукъ табдырыуда, административ органлада, илму-тинтиу организациялада эмда башха санагъатлада этилген муратланы, салыннган джууаблы борчланы толтурургъа юренедиле.
Аны 2014-чю джыл Естествознаниени эресейчи академиясына член-корреспондент этедиле. Ол тамадалыкъ этиб, психология илмуладан 2 аспирант кандидат диссертациясын тыйыншлы дара- джада джакълагъанды. Аны 110-дан аслам илму иши басмаланнганды. Аланы арасында Эресей Федерацияны Окъуу министерствосу теджеб чыгъаргъан, баш окъуу заведениелеге джораланнган китабы, 3 монографиясы, 13-ден аслам окъуу-методика иши, ВАК рецензия бериб чыкъгъан 15-ден аслам статьясы, МБД-гъа кирген 10 илму статьясы, эресейчи басмалада чыкъгъан 80-дан аслам статьясы, тезиси барды. 2011-чи джыл «Иги илму китаб» деген конкурсда хорлагъанды. Эресей Федерацияны Правительствосу бла РГНФ-ны 4 илму грантына ие болгъанды. Аны тышында да кёб саугъагъа тыйыншлы болгъан- ды. Аланы арасында: Къарачай-Черкес Республиканы Халкъ Джыйылыууну (Парламентини), Къарачай-Черкес Республиканы Билим бла илму министерствосуну Хурмет грамоталары, «Профессор года» деген миллет ёчню диплому, башха саугъалары бардыла. Ол «Къарачай-Черкес Республиканы илмусуну махтаулу къуллукъчусу», «Эресей Федерацияны баш билимини хурметли къуллукъчусу» деген сыйлы атланы джюрютеди.
Файзура, адамлагъа халал къуллукъ эте, миллетлени арасында шохлукъну кючюн бегите, халкъыбызны эмда башха миллетлени ёсюб келген тёлюлерине тыйыншлы билим бере, биргесине ишлегенледен, студентледен, илму къуллукъчуладан бюсюреу таба урунады.

Лепшокъланы Хусеин.