Мындан алда «Бирикген Эресей» партия бардыргъан «Сила России» деген бютеу Эресей марафонну тамалында Джёгетей Аягъы районда шахматладан турнир болгъанды. Ол «Движение первых» деген аралыкъны базасында бардырылгъанды.

Турнирге къошулгъанланы арасында районну спортчулары, СВО-ну ветеранлары да болгъандыла. Ала, шахмат ойнай, кеслерини сагъыш эте билгенлерин, фахмуларын, билимлерин, тёзюмлюлюклерин танытхандыла. Алайда адамла бир-бирлери бла сынам алмашдырыр мадарла да къуралгъандыла.
«Шахмат турнир тюрлю-тюрлю тёлюлени бирикдирген, арада шохлукъ бегитген ашхы джер болгъанды. Ол ишге СВО-да болгъанланы къошулгъанларыны да терен магъанасы барды. Ала кеслерини юлгюлеринде, этилген муратны, нюзюрню толтурур ючюн, адамда болургъа керекли джигерликни, тёзюмлюлюкню, эркишиликни терк оюм эте билиуню кёргюзгендиле», – дегенди Джёгетей Аягъы муниципал районну администрациясыны тамадасы Лайпанланы Мурат.
Эришиулени аягъында хорлагъанлагъа, ёчлю орунланы алгъанлагъа тюрлю-тюрлю саугъала бергендиле.
«Сила России» деген бютеу Эресей марафон джамагъат спортну кенгертирге, ёсдюрюрге себеб болгъан, адамланы чыныкъдырыргъа джарагъан ашхы оюнду. Къарачай-Черкес Республикада марафонну тамалында, шахмат оюнладан сора да, дженгил атлетикадан спортну башха тюрлюлеринден да кёб иш бардырылгъанды. КъЧР-де марафонну ишине бютеулей да 10 минг адам чакълы бир къошулгъанды.
Бардырылгъан ишни кёзюуюнде уллу, гитче да болуб, адамла бир-бири бла сёлеширча, танышырча хал къуралгъанды. Марафоннга къошулгъанла арада шохлукъну кючюн бегите ойнагъандыла.

Узеирланы Хусей.