Быйыл, къыркъар (август) айдан башлаб, ишлеген адамланы пенсияларына ачха къошулгъанды. Ол затны джоругъу да былайды: пенсионер не къадар кёб джал ала эсе, аны пенсиясына ол къадар иги къошакъ этилгенди.

Аны алыр ючюн, пенсионер тилек къагъыт джазаргъа неда документле джыяргъа керек болмайды. Хар джыл сайын бир заманда ол ишни Эресейни Социал фондуну Къарачай-Черкес управлениеси кеси этеди.
Айхай да, ким да сюеди аны пенсиясына ненча сом къошулгъанын билирге. Аны билген къыйын тюлдю. Джергили Социал фондну клиент бёлюмюнде эмда Кърал джумушланы порталында адамны энчи кабинетинде толу хапар билирге боллукъду. Белгилисича, алгъаракъда пенсиягъа чыгъыб тургъанлай да ишлеринден кетмегенлени пенсияларына джыл сайын башил (январь) айда этилиучю къозлауну (индексацияны) къошмай тургъандыла. Арт кёзюуде аны да къошуб тебрегендиле. Алай а адам ишден чыкъса, анга алгъаракъ джыллада къошулмай тургъан къозлауу да къошулады. Ол, кертиси бла да, иги кесек болады.
Айтыргъа, пенсионер, ишин къоюб кетсе, ишлеген джеринден аны ишден кетгени бла байламлы къагъыт Социал фондха тюшеди. Адамгъа талай джылны ичинде джыйылыб тургъан къозлауу да къошулуб, экинчи айында огъуна джангы джарашдырылгъан пенсиясын табдырадыла.
Социал фондну келечилери адамланы эслерине салыргъа излеген зат барды. Ол да неди десегиз, телефон бла адамлагъа аманлыкъ этиучюледен баш сакъларгъа кереклисиди. Аманлыкъчыла пенсионерлеге Социал фондну къуллукъчусума деб, джалгъан хапарланы айтыб, къоркъутуб, айтханларын этдирирге излейдиле. Алагъа тынгылагъанлагъа сизни пенсиягъызны тыяргъа деб турадыла, мен болушайым неда пенсиягъызны уллуракъ этерча мадарла бардыла, дегенча болмагъан затланы айтадыла. Аллайла адамланы башларын къатышдырыргъа излейдиле, алай бла муратларына джетерге кюрешедиле. Аланы къапханларына тюшмезге керекди.
Социал фондну къуллукъчуларыбыз деб, телефон бла сёлешгенлеге ийнаныргъа керек тюлдю. Алагъа персонал данныйлеригизни айтмагъыз. Фондну адамлары телефон бла СНИЛС-ни, паспортну данныйлерин, банк картаны номерин, аны ПИН-кодун неда энчи кабинетни паролюн сормайдыла. Аллай адет джокъду. Телефон бла аллай затланы соргъанла кир иннетли адамладыла.
Андан сора да, фондну къуллукъчулары ол, бу керекди деб, адамланы юйлерине айланмайдыла, адамладан телефон бла хапар да сормайдыла, айтыргъа, джукъ излемейдиле.
Аны тышында, ачха берсегиз пенсиягъа чыгъарыргъа, пособие алдырыргъа болушурма, дегенлеге да тынгыларгъа керек тюлдю. Ала, ачхагъызны да алыб, джукъ да этмей къоярыкъдыла. Ол джумушла бла Къарачай-Черкес Республиканы Социал фондуну клиент бёлюмю кюрешеди. Аны кибик бу ишни кёб функциялы аралыкъда да тындырыр мадар барды. Ол джумуш бир сом да тёленмегенлей этиледи. Пенсиягъа чыгъаргъа къагъытларын джарашдыргъан адамдан ачха изленмейди.
Сорлугъу болгъан, не затны болса да билирге излеген Эресей Федерацияны Социал фондуну сайтына эмда Къарачай-Черкесияны Социал фондуну социал сетлеринде официал аккаунтлагъа кирирге боллукъду – «ВКонтакте» къауумгъа, «Одноклассники» къауумгъа эмда МАКС-ха. Аны бла бирге джергили Социал фондну контакт-аралыгъына да 8(800)100-00-01 номер бла сёлеширге (ол хакъсызды) боллукъду. Аралыкъны джергили операторлары баш кюнден байрым кюннге дери эртденбла 8:00 сагъатдан 17:00 сагъатха дери ишлейдиле.

КъЧР-ни Социал фондуну пресс-къуллугъу.