«Лучший учитель родного языка и родной литературы» деген V-чи саулай Эресей конкурсну финалы быйыл къыркъаууз (сентябрь) айны ал сюреминде Липецк шахарда бардырыллыкъды.

Анга конкурсну регионал кёзюулеринде хорлагъан устазла къошуллукъдула. Липецк шахаргъа Къарачай-Черкесиядан да эки устаз барлыкъды – Къарачай шахарда Байрамукъланы Джатдайны атын джюрютген 1-чи номерли орта школну къарачай тил бла адабиятдан устазы Лайпанланы Фатима бла Адыге-Хабль элни «Светлячок» деген сабий садыны юретиучюсю Радима Мисрокова.
Конкурсну финалы къыркъаууз (сентябрь) айны 8-де, Эресейни халкъларыны тиллерини кюнюнде, ачыллыкъды. Анга къошулгъан устазла ана тилден дерслени къалай бергенлерини методикалары бла шагъырей этерикдиле, сабий садлада ишлегенле да школгъа джюрюмеген сабийлени ана тилде сёлеширге къалай юретгенлерини, тил бла маданият байлыкъны сакълауда ата-анала эмда джамагъат бирлешликле бла байламлылыкъ джюрютгенлерини юсюнден хапар айтырыкъдыла.
«Лучший учитель родного языка и родной литературы» конкурсну эсеблери къыркъаууз айны 11-де чыгъарыллыкъдыла.
Алайды да, бизни республиканы келечилерине конкурсда джетишимле теджейбиз. Ала атларын махтау бла айтдырыб къайтырыкъларына ышанабыз.

(БИЗНИ КОРР.).