Бу кюнледе Архызда «Тау тёппеле» («Горные вершины») аты бла бардланы XXXV-чи джыр фестивалы ётдю.

Анга Челябинск, Ростов, Москва областладан, Краснодар, Ставрополь крайладан, Адыгея Республикадан, Санкт-Петербург шахардан эмда Эресейни бирси регионларындан бютеулей 55 джырчы эмда коллективле къошулгъан эдиле. Проектни баш мураты фахмулу адамланы атларын белгилерге, аланы чыгъармаларыны юсю бла бир-бири бла байламлылыкъ джюрютюрча этерге эмда маданиятны ёсюм алырлай адетлерин да сакъларгъа эди.
Къууанч джыйылыуну Къарачай-Черкесияны артистлери хазырлагъан джыр эмда тепсеу программалары бла ачдыла.
– Бюгюн Къарачай-Черкесияны таурухлу ариу джеринде бардырылгъан фестивалгъа эллиден аслам фахмулу, чемер адам келгенди. Талай джылны мындан алда бу проект джангы къуралгъан заманда, биринчи фестиваль былайдан башланнган эди. Келген къонакъланы, фестивалгъа къошулгъан адамланы да бизни джомакълы ариу тауларыбыз бла шагъырей эте, биз бек сюйюб ачыкъ джюрекден къонакъбайлыкъ этебиз. «Хош келигиз» деб бизни тау джуртларыбызгъа чакъырабыз. Мындан ары да маданиятны айнытыу муратда бу тукъум адет тохтамагъанлай, фестиваль хар джыл сайын бардырылгъанлай турлукъду деб ышанабыз. Фахмулу адамланы чыгъармачылыкъ джолларына быллай къууанч тюбешиуле себеблик этериклерине ишексизбиз, – деди Халкъ маданиятны республикан аралыгъыны тамадасы Артем Разин.
Фестивалны «Интеллектуально-творческое объединение молодежи» деген Къарачай-Черкес джаш тёлюню хакъындан бирлешлик къурагъанды. Ол Эресейни Маданият министерствосу, В.Д.Поленовну атын джюрютген Халкъ творчествону юйю, Къарачай-Черкесияны Маданият министерствосу эмда Халкъ маданиятны республикан аралыгъы болушлукъ этиб бардырылгъанды.
Проектни хайырландырыргъа, джашаугъа сингдирирге Маданият башламчылыкъланы президент фонду кёлтюргючлюк этгенди.

БАТЧАЛАНЫ Фатима.