Къарачай-Черкесияда «Абилимпикс» деген  чемерликни тёртюнчю миллет чемпионаты баргъанды. Республиканы Правительствосуну Председателини заместители Чеккуланы Хызыр, анда хорлагъанланы алгъышлай: «Бюгюн биз былайгъа «Абилимпикс» деген  чемерликни тёртюнчю миллет чемпионатыны эсеблерин чыгъарыргъа джыйылгъанбыз. «Абилимпиксни» конкурсу сизге кёб зат берген эришиуледиле. Конкурсха къошулгъан эм тыйыншлы джашла бла къызла анда хорлагъан да этгендиле. Энди ала бир-бирлери бла танышыргъа, бир-бирлерине хапарларын айтыргъа боллукъдула», - дегенди.

Вице-премьер айтхандан, «Абилимпикс» джаш тёлюге фахмусун ачыкъларгъа, билимин, усталыгъын ёсдюрюрге  мадар береди, уллу джетишимлеге джетерге болушады. «Ол себебден сизни бу эришиулеге хазырлагъан устазлагъа да, сизни кесигизге да джюрек разылыгъымы билдире, сизге кючлю саулукъ, джангы джетишимле теджейме», - дегенди Чеккуланы Хызыр.

Андан сора ол «Абилимпиксни» 12 компетенциясында хорлагъан 36 устагъа дипломла бла ачха саугъала бергенди. Костыркина Анна кесини компетенциясында биринчи орунну алгъанды; аны кибик Орусланы Альбина, Калоева Виктория, Ёртенланы Медина, Слюсарь Александр дагъыда талай джаш бла къыз кеслерини усталыкъларында хорлагъандыла.

Эришиуледе уллу джетишимлеге джетгенлени КъЧР-ни билим бла илму министри Кравченко Инна да джылы алгъышлагъанды.

Быйыл «Абилимпиксни» бу эришиулерине республиканы билим берген учреждениелеринде, алай демеклик школла бла профтехучилищеледе окъугъан къызла бла джашладан 67 адам къошулгъанды.

«Абилимпиксни» республикан конкурсунда хорлагъанладан 12 адам энди Чемпионатны абыстол (ноябрь) айны 20-дан 23-не дери Москвада барлыкъ эришиулеринде Къарачай-Черкесияны сыйы ючюн кюреширикди.

 (БИЗНИ КОРР.).

 

 
{jcomments}