Москвада Финанс университет Эресей Федерацияны эм иги баш окъуу заведениелерини бириди.
Анда баш билим алыб чыкъгъанладан кёбле, Къарачай-Черкесияда да атларын айтдырыб, джетишимли ишлейдиле.
Бу университетни бютеу къралгъа айтылыб тургъанында, айхай да, аны ректору, бизни джердешибиз Эскиндаров Михаил Абдурахмановични да уллу юлюшю барды. КъЧР-ни Башчысы Темрезланы Рашид, Эскиндаров Михаил Абдурахмановични, бизни регион да ичинде болуб, къралгъа хар не джаны бла да билимли къуллукъчула хазырлаугъа салгъан къыйынына уллу багъа бериб, аны окъуу заведениени профессор-устаз коллективи къараб тургъанлай, республиканы баш саугъасы «Къарачай-Черкесияны аллында махтаулу ишлери ючюн» деген ордени бла саугъалагъанды. Ол кёзюуде алайда Эресей Федерацияны Федерал Джыйылыууну Федерация Советини КъЧР-ден члени Салпагъарланы Ахмат, республиканы вице-премьери, КъЧР-ни Москвада таймаздан ишлеген келечиси Гогова Мадина да болгъандыла.
Темрезланы Рашид, джердешибиз Эскиндаров Михаил Абдурахмановичге саугъасын бере туруб, аны КъЧР-ни ордени бла саугъалауну юсюнден указгъа Къарачай-Черкес Республикагъа 25 джыл толгъаны бла байламлы къыркъаууз (сентябрь) айны 7-де къол салыннганын айтханды. Аны бла бирге ол: «Михаил Абдурахманович Къарачай-Черкесиягъа да кёб финанс къуллукъчу хазырлагъанды.
Алай бла туугъан республикасын ёсдюрюуге уллу къыйын салгъанды, салыб да турады», - деб чертгенди. Эскиндаров Михаил да, саугъаны ала, Къарачай-Черкесия дженгил ёсюб баргъан республика болгъанын, анга уллу финанс билимли къуллукъчула хазырларгъа мындан ары да тыйыншлы эс бёлюб турлугъун айтханды. Республиканы быллай уллу саугъасын бергени ючюн КъЧР-ни Башчысы Темрезланы Рашидге да джюрек разылыгъын билдиргенди.
