Эресей бла Беларусну Регионларыны бешинчи форумларында эки къралны президентлери да къошулуб, аланы парламентлерини спикерлери Матвиенко Валентина бла Мясникович Михаил джыйылыу  бардыргъандыла. Ол джыйылыугъа Къарачай-Черкесияны Башчысы Темрезланы Рашид да чакъырылыб болгъанды.

Матвиенко Валентина Эресей бла Беларусну регионларыны башчыларын, эки къралны халкъларыны хайырларына этимли ишлер ючюн, бир-бирлерине дагъан болуб ишлерге, эресей-беларусь шохлукъну сакъларгъа, эки къралны араларында баргъан экономика, сатыу-алыу, турист иш джюрютюулени бегитирге чакъыргъанды.

Уллу Хорламны Эресейни Президенти Путин Владимир айтхан 75-джыллыгъын белгилеуню юсюнден да баргъанды джыйылыуда сёз. Темрезланы Рашид, ол къазауатда бу эки къралны адамлары, Къарачай-Черкесияны уланлары бла къызларын да айтыб, бир билек болуб сермешгендиле.

Къарачай-Черкесияны Башчысы Хорламны ол джыллыгъыны къууанчын этерге хазырланырны аллы бла бизни эки къралны бир-бирлерине не къадар джууукъ этер джанындан болуб  кюреширге кереклиси бла байламлы кескин оюмла теджегенди.

«Мен акъыл этгенден, бизни джаш тёлюбюз ветеранларыбызны эсгериуде бирге болур ючюн, бизден Совет Союзну эмда Эресей Федерацияны джигитлери Къасайланы Османны, Хайыркъызланы Кичибатырны, Къаракетланы Юнюсню, бизни Беларусда асыралгъан  бирси батырларыбызны джууукълары кеслерини адамларын эсгерирча мадарла этерге кереклиге санайма. Алай этмекликни тыйыншлы магъанасы да боллукъду», - дегенди ол.

Матвиенко Валентина, Къарачай-Черкесияны Башчысы Темрезланы Рашидни оюмун джакълаб, аны Уллу Ата джурт къазауатда Хорламны 75-джыллыгъын белгилеуню планына къошаргъа теджегенди.