Къарачай-Черкесияны Башчысы Темрезланы Рашид бла КъЧР-ни промышленность бла сатыу-алыу министри Аргунов Мурат Беларусь Республикагъа визит бла баргъан заманларында бизни джердешибиз, Совет Союзну Джигити Къасайланы Муссаны джашы Османны Могилёвну мемориал комплексинде къабырына гокка хансла салгъандыла.

Беларусь Республикада Къасайланы Османдан сора да бизни эки батыр уланыбыз – Эресей Федерацияны Джигити Хайыркъызланы Алимырзаны джашы Кичибатыр бла Эресей Федерацияны Джигити Къаракетланы Кёккёзню джашы Юнюс - ала кибик къазауатны джылларында фашист кючлеучюлеге къаршчы баргъан сермешиуледе ёлген джюзле бла бирси джердешлерибиз асыралгъандыла.

Темрезланы Рашид, аны юсюнден айта: «Беларусда бизни джердешлерибизни атларын сый бериб эсгередиле. Бизни джигитлерибизни атлары, джуртлары Къарачай-Черкесияда элле бла шахарланы орамларына аталыб къалмай, алагъа эсгертмеле бла мемориал къангала туугъан джерлеринде салыныб къалмай, мында, Беларусда да, салыннгандыла. Къасайланы Османны аты, сёз ючюн, Могилёв, Минск шахарланы орамларына да аталгъанды. Минск областда да бир эл бла бир орта школ да аны атын джюрютедиле. Бизни джигит джердешлерибизни атлары Белоруссияны къоруулагъанланы тизимлерине алтын харифле бла джазылгъандыла.

Мен акъыл этгенден, бизни къазауатны джылларында болгъан ишлени, ветеранланы-фронтовиклени эсгергенибиз бизни къралларыбыз бла халкъларыбызны хар заманда бир-бирлери бла къысха байламлы этгенлей турлукъдула. Биз келир тёлюлерибиз да ол ишлени сый бериб эсгериб турурча этерге керекбиз. Хорламны болдургъанла ёмюрлюкге бизни джюреклерибизде джашарыкъдыла. Ёмюрлюк махтау алагъа!» - дегенди.