Эресей бла Беларусну Регионларыны бешинчи форумуну пленар джыйылыуундан сора Къарачай-Черкесияны Башчысы Темрезланы Рашид бла Беларусь Республиканы Правительствосуну Председателини заместители Игорь Петришенко сатыуалыу-экономика, илму-техника, социал эмда культура иш джюрютюулени юслеринден келишиуге къол салгъандыла.
«Ол документни тамалында Къарачай-Черкесия бла Беларусну араларында бардырыллыкъ ишле Форумну пленар джыйылыуунда сёлеше Эресейни Президенти В. Путин бизни къралларыбызны регионларыны араларында экономика-турмуш, маданият-гуманитар байламлылыкъларыбызны кенгертиуню юсюнден салгъан борчланы излемлерине толу келиширикдиле.
Беларусь Республика тыш сатыу-алыуда Къарачай-Черкесияны баш нёгерлерини бириди. Биз аны бла эл мюлк продукцияла хазырлау, къурулуш керекле, джюн кийимле бла джюн затла чыгъарыу санагъатлада иш джюрютелликбиз. Туризм да эки арада иш джюрютюуню бир деменгили чыгы болаллыкъды. Джаш тёлю бла бардырылгъан аскер-патриот юретиу да бизни бирикдирлик ишлени бириди.
Бу ишле эки къралны регионларыны араларындача, бизни ортакъ тарихибиз бирикдирген адамларыбызны араларында да бардырылыб турлукъдула», - деб джазгъанды Темрезланы Рашид Инстаграмда, къол салыннган документни Къарачай-Черкесиягъа да, Беларусь Республикагъа да уллу магъанасы боллугъун черте.
