Беларусь Республиканы Могилёв шахарында Эресей Федерация бла Беларусь Республиканы Регионларыны «Приоритетные направления развития регионального сотрудничества как ключевого фактора интеграции и союзного строительства» деген аты бла бешинчи форумлары болгъанды.

Эресей Федерацияны Федерал Джыйылыууну Федерация Советини Председатели Матвиенко Валентина чакъырыб, аны ишине Къарачай-Черкесияны Башчысы Темрезланы Рашид да къошулгъанды.

Эресей бла Беларусну президентлери, бу эки къралны регионларыны, аны кибик тюрлю-тюрлю ишле джюрютген органланы башчылары да къошулуб, ол Форум джыл сайын да баргъанлай турады. Аны ишин а Эресей Федерацияны Федерал Джыйылыууну Федерация Совети эмда Беларусь Республиканы Миллет Джыйылыуу къурайдыла, аны бардыргъан да ала этедиле.

Форумда Эресей Федерация бла Беларусь Республиканы регионларыны араларында сатыу-алыуэкономика, аны кибик турист иш джюрютюулени
ёсдюрюу бла кенгертиуню тюрлю-тюрлю ишлери сюзюледиле. Сюзюлген ишле джашау орунлу бола да барадыла.

Аны юсюнден Форумну пленар джыйылыуунда сёлешген заманларында Эресей Федерацияны Президенти Путин Владимир бла Беларусь Республиканы Президенти Лукашенко Александр да айтхандыла.


 «Бу залда, - дегенди Путин Владимир, ол джыйылыуда сёлеше, - Эресей Федерация бла Беларусь Республиканы кёб областы бла субъектини башчылары, аны кибик парламентарийлери, бизнеслерини келечилери, белгили джамагъат къуллукъчулары, алай демеклик эки къралны араларында къарнаш иш джюрютюулени гуждарлары олтурадыла. Ала эки арада байламлылыкъланы ёсдюрюу, кенгертиу, алагъа джангы кюч-къарыу бериу джаны бла бек уллу иш бардырадыла.

Алай болса да мен былайда Форумну сопредседателлери Матвиенко Валентина Ивановна бла Мясникович Михаил Владимировични бу ишни джарашдырыргъа къошхан уллуюлюшлерини юслеринден айырыб айтыргъа излейме. Сизни башламчылыгъыгъызны кючюнден, багъалы коллегала, Эресей Федерация бла Беларусь Республиканы Регионларыны форуму эки джанлы иш джюрютюулени этимли аралыкълары болуб турады.

Эм хайырлысы – Форумда дискуссияла бардыргъанла эки къралгъа да керекли, бирча файдалы затланы къозгъаб сёлешедиле. Айтханларын джашау орунлу этерге да кюрешедиле. Алай бла айтылгъан бла этилген бизни къралланы регионларыны араларында иш, маданият-гуманитар байламлылыкъланы андан ары кенгертирге болушадыла.

Айырыб чертерге излегеним – Эресей Белоруссия бла бардыргъан союз иш джюрютюулерин бек багъалатады. Ашхы хоншулукъну эмда эки джанына да хайыр келтириу джорукъну тамалында аны бла джюрютген байламлылыкъларыбызны таймаздан ёсдюре да барабыз. Александр Григорьевич бла мен эки къралны арасында сатыу-алыу-экономика иш джюрютюулеге, сатыу-алыу-экономика байламлылыкълагъа айырыб аслам магъана бергенибизни чертерге излейме».

Андан ары сёзюнде Эресей Федерацияны Президенти Путин Владимир, джаш тёлюню юретиу ишде тохтаб сёлеше, аны бла бардырылгъан иш ортакъ тарихни эсгериу бла эмда аны багъалатыу бла къысха байламлы болургъа кереклисин излегенин билдиргенди.

«Уллу Ата джурт къазауатны 75-джыллыгъыны аллы бла джаш тёлю, излеучю отрядла къураб, къазауатны заманында ёлген аскерчилени басдырылгъан джерлерин табыуну, аланы атларын ёмюрлюкге белгили этиуню, ала асыралгъан джерле бла алагъа салыннган эсгертмелени ариу тутууну ишлерин бардырыб кюрешеди. Регионланы башчыларыны барын аны ол ишлерин джакъларгъа эмда ол затда анга тыйыншлы болушлукъ этерге чакъырама», - деб чертгенди дагъыда Эресейни Президенти Путин Владимир.

 
{jcomments}