Арт джыллада Черкесскени адамларыны саны ёсгеден ёсюб барады. Аны ичинде туристле да кёбдюле. Машинала да къошулуб барадыла. Ол зат шахарны джерин, инфраструктурасын кенгертирге, ёсдюрюрге кереклисин билдиреди.
Шахарны эм перспективалы джери Шимал микрорайонуду. Арт джыллада алайгъа адамла кёб кёчюб башлагъандыла. Бусагъатда къурулуш ишле да тири бардырыладыла. Адамла джашагъан комплексле бла тенгнге социал инфраструктура да кёлтюрюледи. Этилирге керекли школланы, сабий садланы, саулукъ сакълауну мекямларыны бир къаууму да ишленнгендиле.
Бара-бара Шимал микрорайон, парк зонасы бла, аякъ машинала джюрюген джолчукълары бла, спорт майданчыкълары бла Черкесск шахар бусагъат заманны излемине тамам келишген шахар боллукъду.
Республиканы Башчысы Темрезланы Рашид Тамбиев Русланнга Шимал микрорайонда, адамла иги джашар ючюн, керекли социал инфраструктураны джарашдырыргъа аманат этди.
Маданият бла солууну паркы «Джашил айрымканда» спорт объектле бирлешген комплекс болурча этиуню юсюнде да талай зат белгиленди.
