Ол комиссияны членлери анга КъЧР-ни Къарачай, Зеленчук, Уруп районларында, уллу джангурла джаууб, суу къобханла-затла болгъанларыны юслеринден хапар бергендиле.
Ала билдиргенден, уллу джангурланы хаталары тиймей да къалмагъанды. Бир-бир къобанланы суулары, кёлтюрюлюб, джоллагъа, кёпюрлеге, дамбалагъа халеклик салгъандыла, башха табсызлыкъла болдургъандыла. Черкесск - Доммай, Къарачай шахар - Учкулан джолланы бир-бир джерлерин ырхыла, къобарыб, ашаб, таш-агъач келтириб къуюб, улоу джюрюялмазча этгендиле.
Аны амалтын ёрге баргъанла да, энгишге келгенле да, тохтаб, кюндюзлери бла кечелерини талай сагъатларын джангур тюбюнде ётдюрюрге керек болгъандыла. Ол кёзюулеринде ала ач болур ючюн да, сууукъсурар ючюн да къалмагъандыла. Къарачай-Черкес Орус драма театрны коллективи да, спектаклле кёргюзюб келе тургъанлай, аллай табсыз болумгъа тюшюб, кечесин Огъары Теберди бла Тёбен Тебердини араларында ётдюргенди. Бир игиси, Аллахха шукур, ол кюн юч районда да табигъат чарпыуладан адам ачымагъанды.
Темрезланы Рашид комиссияны джыйылыуунда айтхандан, ол табигъат чарпыуланы заманларында муниципал, республикан эмда федерал дараджалы къуллукъла, биригиб, къурамлы ишлегендиле. Аны себебинден, дегенди ол, къаты джангурла джаууб къуралгъан ырхы джюрюуледен адам ачымагъанды. Джоллагъа-затлагъа заран а джетгенди. Алайды да, дегенди республиканы Башчысы, табигъат чарпыуладан тюшген къоранчны санаргъа, мындан ары кёзюуде ырхы къобханы, чегетлеге от тюшгени-заты болса, аланы дженгил да, хатасыз да онгларгъа хазыр турургъа чакъыргъанды.
«Бюгюн, - дегенди ол, - мен сизни эсигизни бу затха бёлюрге излейме: табигъат чарпыу болгъаны болса, аны онглаб бошагъынчы Табигъат къоркъуусузлукъну къуллукълары бир-бирлери бла къысха байламлылыкъда ишлеб турургъа керекдиле. Былайда сёз неден да алгъа аланы бир-бирлерине хапар бериулери бла бирге ишлеулерини дараджаларын кёлтюрюуню джоругъун сакълауну юслеринден барады. Хар къуллукъну башчысы къайсы заманда къалайда болургъа кереклисин кескин билирге керекди».
Комиссияны членлери, КъЧР-ни Башчысы Темрезланы Рашидни айтханын тюзге санаб, аны толтурургъа хазыр турлукъларын билдиргендиле.
