Эресейни Президенти В. Путинни никколну 7-де къралны адамлары бла ачыкъ халда сёлешгенине, бютеу къралдача, Къарачай-Черкесияда да уллу эс бёлюб тынгылагъандыла. Къарачай-Черкесияны Башчысы Темрезланы Рашид, аны юсюнден кёлюне келгенни билдире: «Ол диалогну кёзюуюнде эресейчиле къралны Президентине берген соруула Къарачай-Черкесия бла къысха байламлы болмасала да, ол, алагъа джууаб бере, оноуларын этерге теджеген хар аманаты бизни республикагъа да тийишеди. Биз да аланы кесибизге берилген аманатланыча толтурургъа борчлубуз», - дегенди.КъЧР-ни Башчысы айтхандан, къралны Президентини халкъ бла бардыргъан диалогу – бу джол да, хар джолдача, Эресейни бюгюннгю джашау болумуна терен сингиб, аны социал халын толу тинтиб, этилмей тургъан затланы ачыкълаб, кючню аланы толтурургъа салыргъа чакъырыуча ётгенди. «Кесигиз кёрюб турдугъуз, - дейди андан ары сёзюнде Темрез улу. - Соруула тюрлю-тюрлю эдиле. Аны себеби адамла къралны башчысына аланы къайгъылы этген затланы юслеринден оюмларын билдире эдиле. Не джашырыу, бизни республика да ала айтхан джарсыуладан кери тюлдю. Джашаргъа джараусуз болгъан мекямла, табигъат джарсыуладан джетген заранны къоратыр ючюн берилирге тыйыншлы кёрюлген сертификатланы тёленмей тургъанлары, ипотеканы толу джарашыб бошамагъаны, бензинни багъасыны кёлтюрюле баргъаны, бир къауум социал учреждениени къыйын болумгъа тюшгени – была, айхай да, бизде да аз тюбеген затла тюлдюле.
Аны барын да айтханым – Президент тюзетирге башхалагъа аманат этген затла бизде да бардыла. Президент билдиргенча, хар айтылгъан зат тинтилиб, аны толтурур амал этилликди. Аланы бирлери, Президентни аманатына кёре, регион дараджада, бирлери да федерал дараджада толтуруллукъдула».
Эресейни Президенти В. Путинни къралны халкъы бла бардыргъан ачыкъ сёзю тёрт сагъат бла джарымны баргъанды. Ол заманны ичинде къралны башчысы джамагъатны 70-ден артыкъ эм магъаналы соруууна джууаб бергенди. Анга уа бютеулей да 2,6 мелиуан соруу тюшюб болгъанды.
В. Путинни къралны адамлары бла быйылгъы ачыкъ сёлешиую, конференц-связны тюрлю-тюрлю мадарлары да хайырландырылыб, аны халкъ бла ары дериги диалогларына ушамагъан джангы формат бла бардырылгъанды.
ХУБИЙЛАНЫ Абу-Хасан.
{jcomments}
