Кечени ауурлугъу кетсе да, кёз къысалмайма. Чабыуулгъа кирген атлы аскерчилеча, соруула бир-бири ызларындан келедиле.

Бир кёзюуде террористлеге джесирге тюшген онгсуз сабийлени къалтыраб джылагъанлары, къычыргъанлары къулагъыма эшитиледиле, джыламукъдан толгъан, къоркъгъандан шашаргъа башлагъан бетчиклери кёз аллыма келедиле. Больницалада джесирге тюшген, ауругъан адамланы болушлукъсуз бет тюрсюнлерин кёреме, ахсыннганларын, ынгычхагъанларын эшитеме.

Школлада, больницалада, вокзаллада, метролада, театрлада, автобуслада, поездледе, самолётлада, … атылгъан тауушла. Эриб, джокъ болуб кетген адамла, юзюлген баш токъмакъла, къолла, аякъла, джерге тёгюлген ичегиле, къан тамырладан чартлаб чыкъгъан къан шоркъала, джылагъанла, ачы сарнагъанла. Дуния джарыгъын кёрмегенлей аналарыны хатхуларында ёлген балачыкъла, ёксюз къалгъан сабийле. Джашаудан иги умутла этиб, толмай къалгъан ашхы муратла. Нени айтайым, нени къояйым? Джукълаялмайма. Интернетге кириб, «Терроризм» деген «бетни» ачыб, къарайма. Окъуйма. Окъугъанларымы ичимден къарачай тилге кёчюреме…

 

1995-чи джыл июнну 14-ден 20-на дери Шамиль Басаевни башчылыгъы бла 195 террорист Будённовск шахарны больницасында 1600 адамны джесир этедиле. Ол терактны ууундан 129 адам ёледи, 415 адам да джаралы болады.

1996-чы джыл январны 9-дан 15-не дери Салман Радуевни башчылыгъы бла террористле Кизлярны больницасында 2000 адам чакълыны джесир этедиле. Ол терактны ууундан 37 адам ёледи, 50-ден артыкъ адам да джаралы болады. Бу кюрешде талай аскерчи, МВД-ны къуллукъчулары, хаталары болмагъан дагъыстанчыла да къырыладыла. Бютеулей да 78 адам ёледи.

1996-чы джыл июнну 11-де Москвада метрода «Тульская» бла «Нагатинская» станцияланы араларында террорист поездни атылтады да, 4 адам ёледи, 12 адам да джаралы болады.

1996-чы джыл июнну 26-да Нальчикни автовокзалында «Минеральные Воды — Нальчик — Владикавказ» маршрут бла баргъан автобусну террористле атылтадыла да, 6 адам ёледи, 40 адам да джаралы болады.

1997-чи джыл апрелни 23-де Армавир шахарны темирджол вокзалында террористле атылтадыла да 3 адам ёледи, 12 адам да джаралы болады.

1997-чи джыл апрелни 28-де Пятигорск шахарны темирджол вокзалыны ичинде террористле атылтадыла да 2 адам ёледи, 22 адам да джаралы болады.

1997-чи джыл июнну 27-де Москвадан Санкт-Петербургга терк баргъан поездни террористле атылтадыла да 5 адам ёледи, 13 адам да джаралы болады.

1998-чи джыл сентябрны 4-де Махачкъалада Пархоменко атлы орамда террористле атылтадыла да, 18 адам ёледи, 91 адам джаралы болады, 28 юй да оюлады.

1999-чу джыл мартны 19-да Владикавказны Ара базарында террористле атылтадыла да 52 адам ёледи, 168 адам да джаралы болады.

1999-чу джыл августну 31-де Москваны Манеж майданында «Охотный ряд» деген сатыу-алыу баргъан джерни террористле атылтадыла да 1 тиширыу ёледи, 40 адам да джаралы болады.

1999-чу джыл сентябрны 4-де Дагъыстанны Буйнакск шахарында адамла джашагъан 5 этажлы юйню террористле атылтадыла да, 64 адам ёледи, 146 адам да джаралы болады.

1999-чу джыл сентябрны 4-ден 13-не дери Москвада бёлек теракт болгъанды. Ол терактладан 234 адам ёлгенди. Москваны Кашир, Гурьянов орамларында юйле оюлгъандыла.

1999-чу джыл ноябрны 10-да Москвада Котляков деген къабырлада террористлени атылтханларындан 14 адам ёледи, 30 чакълы адам да джаралы болады.

1999-чу джыл сентябрны 16-да Волгодонск шахарда 9 этажлы юйню террористле атылтадыла да 19 адам ёледи, 1045 адам да джаралы болады.

2000-чи джыл майны 31-де Волгоградда Жуков атлы орамда аскерчиле эртден азыкъ ашаргъа бара тургъанлай, террористле атылтадыла да, 1 адам ёледи, 15 адам да джаралы болады.

2000-чи джыл июнну 6-да Чечен Республиканы Алхан-Юрт элинде, милицияны мекямыны къатында, эки террорист атылыучу затла джюкленнген машинаны атылтадыла да, 2 милиционер ёледи, 5 милиционер да джаралы болады.

2000-чи джыл июлну 2-де Чечен Республикада террористле минала салыннган джюк машинала бла хайырланыб, талай теракт этедиле да, 30-дан артыкъ аскерчи бла милиционерни ёлтюредиле.

2000-чи джыл июлну 2-де Владикавказ шахарны базарында террористле атылтадыла да 6 адам ёледи, 18 адам да джаралы болады.

2000-чи джыл августну 8-де Москвада Пушкин атлы майданда, джолну бир джанындан бир джанына джерни тюбю бла ётген джерде террористле бомбаны атылтадыла да, 13 адам ёледи, 61 адам да джаралы болады.

2000-чи джыл Пятигорск эмда Невинномысск шахарлада 16:03-16:05 заманны ичинде террористле 4 кере атылтадыла да, 4 адам ёледи, 20 адам да джаралы болады.

2000-чи джыл декабрны 8-де Пятигорск шахарда «Верхний рынокну» тийресинде террорист 2 машинаны бирден атылтады да, 4 адам ёледи, 45 адам да джаралы болады.

2001-чи джыл мартны 15-де Стамбулдан Москвагъа учарыкъ, ичинде да 174 адамы болгъан Ту-154 самолётну террористле кючлегендиле. Самолётну Сауд Аравиягъа сюрдюрюб анда джерге къондургъандыла. Мартны 16-да джесирлени къутхарыргъа деб спецназ самолётха чабыуул этген заманда 1 стюардесса ёлгенди. Террористледен да бири ёлгенди.

2001-чи джыл мартны 24-де Минеральные Воды шахарны Ара рыногуна кирген джерде, террористле ичинде 50 кг атылыучу заты болгъан ВАЗ-2103 машинаны атылтхандыла. 21 адам ёлгенди, 100 адам да джаралы болгъанды.

Ол кюн Ессентуки шахарда ГИБДД-ны мекямыны къатында террористле ичинде бомбасы болгъан ВАЗ-2106 машинаны атылхандыла да, 22 адам джаралы болгъанды.

Ол кюн огъуна Невинномысскеге бара тургъан ВАЗ-2106 машинаны ич ишлени къуллукъчулары тохтатыб, тинтгенлеринде 40-килограммлыкъ бомбаны кёргендиле. МВД-ны эксперт-взрывотехниклери машинаны Адыге-Хаблден узакъ болмай чегетге элтиб анда, адамлагъа зараны джетмезча этерге умут этгендиле. Бомбаны къоркъунчсуз этерге излегенлей, бомба атылгъанды да, МВД-да ишлеген 2 эксперт-взрывотехник джаш ёлгендиле.

2001-чи джыл августну 19-да Астрахань шахарны эм уллу базарында террористле бомбаны атылтхандыла да, 8 адам ёлгенди, 30 адам да джаралы болгъанды.

2001-чи джыл сентябрны 17-де Баш штабны аскер комиссиясын алыб учуб баргъан вертолётну, террористле тюбюнден окъ-тоб атыб, уруб, кюйдюргендиле. Вертолётда учуб баргъан 13 адам ёлгенди.

2001-чи джыл ноябрны 29-да Чечен Республиканы Урус-Мартан элини Ара майданына районну коменданты генерал-майор Гейдар Гаджиев келгенлей, кесини джашауун джукъгъа санамагъан террорист тиширыу, кеси кесин атылтханды. Алайда генерал Гаджиев ёлгенди, аны юч сакълаучусу да джаралы болгъандыла.

2002-чи джыл апрелни 28-де Владикавказ шахарны Ара базарында террористле бомбаны атылтхандыла да, 9 адам ёлгенди, 46 адам да джаралы болгъанды.

2002-чи джыл майны 9-да Дагъыстанны Каспийск шахарында аскерле тизгин болуб ётюб баргъан заманда террористле бомбаны атылтхандыла да, 45 адам ёлгенди (аладан 12-си сабий), 170 адамдан артыкъ да джаралы болгъанды.

2002-чи джыл октябрны 10-да террористле Грозныйни Заводской районуну РОВД-ны мекямын атылтхандыла да, 25 адам ёлгенди.

2002-чи джыл октябрны 19-да Москваны Покрышкин атлы орамында орналгъан «Макдональдсны» тюз къатында, ичинде бомбасы болгъан «Таврия» машинаны атылтхандыла. 1 адам ёлгенди, 8 адам да джаралы болгъанды.

2002-чи джыл октябрны 23-ден 26-на дери, Москвада Дубровкадагъы театрда террористле 900 адам чакълыны джесирге алыб тургъандыла. Россиячы спецназ джесирлени къутхарыргъа излеб чабыуул этген заманда, театрны ичине газ джибередиле да, ол газны ууундан джесирледен 129 адам, террористледен да 41 адам ёлгендиле.

2002-чи джыл декабрны 27-де Грозныйде Чечен Республиканы Правительствосуну юйюн атылтхандыла. 72 адам ёлгенди, 210 адам да джаралы болгъанды.

2003-чю джыл майны 12-де Чечен Республиканы Надтеречный районунда, террорист тиширыу, атылыучу затла джюкленнген «КамАЗ» машинаны джюрютюб барыб, УФСБ-ны район бёлюмюню къатында атылтханды. 60 адам ёлгенди, 200-ден артыкъ адам да джаралы болгъанды.

2003-чю джыл майны 14-де Чечен Республиканы Гудермес районуну Илисхан-Юрт элинде дин байрам бара тургъанлай, террорист тиширыула атылыучу устройствону атылтыб, 30 адамны ёлтюргендиле, 150 адамдан артыкъны да джаралы этгендиле.

2003-чю джыл июнну 5-де Шимал Тегейни Моздок шахарында, аскер бёлекни авиацион-техника къуллукъчуларын алыб баргъан автобусну, террорист тиширыу атылтханды. 19 адам ёлгенди, 20 адам чакълы да джаралы болгъанды.

2003-чю джыл июлну 5-де Москвада Тушино аэродромда «Крылья» деген рок-фестиваль бара тургъанлай, эки террорист тиширыу кеслерин атылтхандыла да, 16 адам ёлгенди, 50 адам чакълы да джаралы болгъанды.

2003-чю джыл июлну 9-да Москвада 1-чи Тверской-Ямской орамда Зарема Мужахоева деген бир тиширыу теракт этерге башлагъанлай, тутуб къойгъандыла. ФСБ-ны къуллукъчусу Георгий Трофимов атылыучы затны къоркъуусуз этерге излегенди. Алай а ол бомба атылыб къалгъанды да ФСБ-ны взрывотехниги алайда ёлгенди.

2003-чю джыл августну 1-де, террористле Моздок шахарда госпиталны атылтхандыла. 50 адам ёлгенди, 60 адам да джаралы болгъанды.

2003-чю джыл августну 25-де Краснодарда террористле автобусла тохтаучу юч джерни атылтхандыла да, 4 адамны ёлтюргендиле, 15 адамны да джаралы этгендиле.

2003-чю джыл сентябрни 3-де Кисловодскеден Минводха баргъан электропоезд Подкумок бла Белый Уголну ортасына джетерге, террористле поезни атылтхандыла. 7 адам ёлгенди, 80 адам чакълы да джаралы болгъанды.

2003-чю джыл декабрны 5-де Кисловодскеден Минводха баргъан электропоезд Ессентукиге джете тебрегенлей, террористле атылтадыла да, 44 адам ёледи, 156 адам да джаралы болады.

2003-чю джыл декабрны 9-да Москвада «Националь» деген къонакъ юйню къатында террорист тиширыу кесин атылтады да, андан узакъ болмай тургъан 6 адам ёледи, 14 адам да джаралы болады.

2004-чю джыл февралны 6-да Москваны метросунда «Автозаводская» бла «Павелецкая» станцияланы арасында террорист кеси кесин атылтады да, 42 адам ёледи, 250 адам да джаралы болады.

2004-чю джыл майны 9-да Грозныйни стадионунда атылыу болады да 14 адам ёледи, аланы ичлеринде Чеченни президенти Ахмат Кадыров да ёледи.

2004-чю джыл июнну 21-ден 22-не атлагъан кечеде террористле Ингуш Республиканы кюч ведомстволарына чабыуул этедиле. Тюрлю-тюрлю ведомстволаны джюзле бла къуллукъчуларын ёлтюредиле. Ёлгенлени араларында Ингуш Республиканы Ич ишлерини министрини борчларын толтургъан Костаев Абукар да, аны заместители Котиев Зяудин да боладыла. Ёлгенлеринден сора А. Костаевге «Россия Федерацияны Джигити» деген сыйлы ат бериледи, З. Котиев да «Джигитликни Ордени» бла саугъаланады.

2004-чю джыл июлну 19-да Воронеж шахарда теракт болады да, 1 адам ёледи.

2004-чю джыл августну 24-де Москвада Домодедово аэропортдан учхан «Сибирь» авиакомпанияны Ту-154, «Волга-Авиаэкспресс» авиакомпанияны да Ту-134 самолётларын террорист тиширыула кёкде бир заманда атылтадыла. Ол терактладан 90 адам ёледи.

2004-чю джыл августну 31-де Москвада «Рижская» станциядан узакъ болмай, метрода террорист тиширыу, бомбаны атылтады да, 10 адам ёледи, 50 адам да джарсыйды.

2004-чю джыл сентябрны 1-де Бесланда (Шимал Тегейде) террористле школда сабийлени джесирге аладыла. Атылыудан 334 адам ёледи (аладан 186-сы сабийле боладыла), 800 адамдан артыкъ да джаралы болады.

2005-чи джыл октябрны 13-де сагъат 9 бла 20 минутда Нальчикде МВД-ны, ФСБ-ны, Центр «Т»-ны, чекчилени бёлюмлери строевой смотр эте тургъан заманда, 12 террорист джыйын алагъа чабыуул этедиле. Ол сермешледе 87 террористни ёлтюредиле, 50 террористни да тутадыла. Алай болса да, кюч структураладан 35, тюз адамладан да 12 адам ёледиле;

100-ден артыкъ адам джаралы болады (аланы ичлеринде 85-си – структураланы къуллукъчулары).

2006-чы джыл августну 8-де Дагъыстанны Буйнакск шахарында эртденбла сагъат 8 бла 35 минутда шахарны прокурору Битар Битаров машинасы бла ишге бара, джолну джанында тохтаб тургъан бир машинаны тюз тенглигине джетерге, террористле ол машинаны атылтадыла. Ауур джаралы болгъан Битаровну больницагъа джетдирселе да, ол эсин джыялмагъанлай ёледи. Ол алай болгъандан сора, бир сагъат чакълыдан Дагъыстанны ич ишлерини министри Адильгерей Магомедтагиров Буйнакскеге тебрейди. Магомедтагировну машинасы Талги деген элге джетерге джолда эки бомба атыладыла да, аны ызындан террористле министрни машинасына автоматладан атыб тебрейдиле. Министр бир кесек контузия болса да, машинасы бронированный болгъаны себебден анга окъла тиймейдиле. Алай а, аны биргесине келген 2 милиционер ёледиле, бир милиционер да джаралы болады.

2006-чы джыл Москвада Черкизовский рынокда террористле бомбаны атылтадыла да, 14 адам ёледи, 61 адам да джаралы болады.

2007-чи джыл октябрны 31-де Тольятти шахарда автобусну атылтадыла. 8 адам ёледи, 55 адам да джаралы боладыла.

2007-чи джыл ноябрны 22-де Пятигорскеден Владикавказгъа баргъан «Икарус» автобусну атылтадыла да, 5 адам ёледи, 13 адам да джаралы болады.

2007-чи джыл ноябрны 22-де Невинномысскени автовокзалында автобусну атылтадыла. 2 адам ёледи, 14 адам да джаралы болады.

2008-чи джыл Сочини Лоо Лазаревский районуну пляжында атылыу болады да, 2 адам ёледи, онла бла адамла да джаралы боладыла.

2008-чи джыл ноябрны 6-да Владикавказда террорист тиширыу маршрут таксини ичинде кесин атылтады да, 12 адам ёледи.

2009-чу джыл августну 17-де Назранда теракт этедиле да, 25 адам ёледи, 136 адам да джаралы болады.

2009-чу джыл ноябрны 27-де «Невский экспресс» поездни атылтадыла. 28 адам ёледи, 136 адам да джаралы болады.

2010-чу джыл январны 6-да Махачкъалада минала салыннган «Нива» машина бла террорист ГИБДД-ны базасына кирирге умут этеди. Ол кёзюуде анда развод бара тургъанды. УАЗ машина бла постдан чыгъыб келе тургъан ГИБДД-ны къуллукъчулары аны эсгериб, машиналарын «Ниваны» аллына кёнделен саладыла. Ол кёзюуде «Нива» атылады да 5 адам ёледи, 24 адам да джаралы боладыла.

2010-чу джыл февралны 5-де Махачкъалада ГУВД-ны тамадасы Ахмед Магомедов кърал машина бла келе тургъанлай, террористле Магомедовну да, аны биргесинде келген 3 милиционер джашны да ёлтюредиле.

Ол кюн огъуна, Дагъыстанны Избербаш шахарында, экстремизмге къаршчы кюрешген районла арасы бёлюмню тамадасы подполковник Гапиз Исаев «Нива» машинасында келе тургъанлай, террористле аны машинасын атылтадыла да, Исаев ёледи.

2010-чу джыл мартны 29-да Москвада 7 сагъат бла 56 минутда метрону «Лубянка» атлы станциясында вагон атылады. 8 сагъат бла 37 минутда «Парк культуры» станцияда да бир атылыу болады. Эки терактдан 41 адам ёледи, 85 адам да джаралы болады.

2010-чу джыл мартны 31-де Дагъыстанны Кизляр шахарында 8 сагъат бла 40 минутда атылыу болады. Ол атылыу болгъан джерге кюч ведомстволаны къуллукъчулары эмда шагъатла келгенлейлерине, дагъыда бир атылыу болады. 12 адам ёледиле, 23 адам да джаралы боладыла.

2010-чу джыл апрелни 5-де Ингушетияны Карабулак районуну милиция бёлюмюню мекямыны къатында террористле эки бомбаны атылтадыла. 2 милиционер ёледиле, 4 милиционер да джаралы боладыла.

2010-чу джыл апрелни 29-да Дагъыстанда 17 сагъат бла 45 минутда ГИБДД-ны къуллукъчулары бир машинаны тохтатханлай, машина атылады. Машинаны ичиндеги террористледен сора да 2 адам ёледиле, 17 адам да джаралы боладыла (джарсыгъанланы бири сабийчик болады).

2010-чу джыл майны 1-де Нальчикни ипподромунда атылыу болады. Уллу Ата джурт къазауатны ветераны, 94 джыл болгъан Саидли Шибзухов ёледи, 30 адам да джаралы болады (джаралы болгъанланы араларында сабийле, тиширыула да болгъандыла).

2010-чу джыл майны 7-де, кече Дербент шахарны автовокзалында атылыу болады да 2 адам ёледи, 8 адам да джаралы болады.

2010-чу джыл майны 13-де Дагъыстанны Сергокалин районунда мобил связны станциясына эмда телевышкагъа террористле окъла джаудура келедиле да ахырында атылтадыла. Ол кюнню эртденбласында, милицинерле бла бирге ремонт этиучюле келе тургъанлай, террористле алагъа окъ-тоб атыб тебрейдиле да, 8 адамны ёлтюредиле.

2010-чу джыл майны 26-да Ставрополь шахарда ДКиС профсоюзов деген мекямны майданчыгъында теракт болады. 8 адам ёледи, 45 адам да джаралы болады.

2010-чу джыл июнну 4-де Ингушетияны Малгобек районуну Сагопши элини бир тюкенин атылтадыла да, 1 милиционер ёледи, 17 адам да джаралы болады.

2010-чу джыл июнну 12-де Каспийск шахарда ОВД-гъа кирген джерге от тюшюб, аны джукълата тургъанлайларына, террористле атылтхандыла. Отну джукълата тургъанладан алайда огъуна 1 адам джан бергенди, 2 милиционер бла бир озуб баргъан адам да джаралы болгъандыла.

2010-чу джыл июнну 21-де Басхан ГЭС-де 5-6 минутну ичинде террористле эки кере атылтхандыла. 2 адам ёлгенди, 2 адам да джаралы болгъанды.

2010-чу джыл сентябрны 4-де Буйнакск шахарда орналгъан 136-чы бригаданы арбазына бир террорист машина бла кириб барыб, кесин да машинаны да атылтханды. 5 адам ёлгенди, 26 адам да джаралы болгъанды.

2010-чу джыл сентябрны 9-да Владикавказ шахарны базарында террорист машинасы бла бирге кесин да атылтады. 17 адам ёледи, 158 адам да джаралы болады.

2010-чу джыл октябрны 9-да Грозный шахарыны Ленин атлы районунда террористле атышыуну башлайдыла да ёлгенле да, джаралыла да боладыла.

2011-чи джыл Хасавюрт шахарда, «Белые ночи» деген аш юйню къатында, террорист «ВАЗ-2107» машинаны атылтады да, 3 адам ёледи, 5 адам да джаралы болады.

2011-чи джыл январны 24-де Москвада Домодедово аэропортда террорист бомбаны атылтады. 37 адам ёледи, 130 адам да джаралы болады.

2011-чи джыл февралны 9-да Грозный шахарда, темир джолну къатында, атылыу болады да, 1 адам ёледи, 1 милиционер бла 1994-чю джылда туугъан бир джашчыкъ да джаралы боладыла.

2011-чи джыл февралны 14-де Дагъыстанны Губден деген элинде эки теракт болады да 2 милиционер ёледи, 27 адам да джаралы болады.

2011-чи джыл февралны 18-де Къабарты-Малкъар Республиканы Басхан районунда, Приэльбрусьеге бара тургъан, ичи туристледен толгъан автобусха террористле къоргъашин окъла джаудургъандыла. 3 адам ёлгенди.

2011-чи джыл августну 31-де Грозный шахарда эки теракт болгъанды. 9 адам ёлгенди, 21 адам да джаралы болгъанды.

2012-чи джыл мартны 6-да Дагъыстанны Карабудахкент элинде бир тиширыу полициячыла болгъан постха барыб, кесин атылтханды. 5 полициячы ёлгенди, 2 полициячы да джаралы болгъанды.

2012-чи джыл майны 3-де Махачкъалада ДПС-ни къатында террористле машинаны атылтадыла. Арадан 15 минут озуб, ол атылгъан джерге полициячыла, къутхарыучула, озуб баргъан адамла да джыйылгъанлай, террористле дагъыда бир «Газель» машинаны атылтхандыла. 13 адам ёлгенди, 90 адам да джаралы болгъанды.

2012-чи джыл августну 6-да Грозный шахарда, «Военторг» тюкенни къатында эки террорист «Газель» машинаны атылтадыла. 4 адам ёледи, 3 адам да джаралы болады.

2012-чи джыл августну 19-да Ингушетияда, тау адетдеча, ёлген адамны юйден чыгъарлыкъларын сакълаб тургъан полициячы джашланы орталарына бир террорист киреди да, кесин атылтады. 7 полициячы джаш ёледи, 15-си да джаралы болады.

2012-чи джыл Дагъыстанны Чиркей деген элинде бир террорист тиширыу, Дагъыстанда муслиман башчыланы бири, 74 джыл болгъан Саид Афанди Чиркейскийни юйюне кириб барыб, кесин атылтханды. Юйню ичинде болгъан 7 адам ёлгендиле, 1 адам да джаралы болгъанды.

2012-чи джыл октябрны 23-де Шимал Тегейни Чермен элинде, ДПС-ни къатында, полицияны гитче лейтенанты Заур Джабилов «ВАЗ-2109» машинаны джюрютюб келген адамны документлерине къараргъа излеб, тохтатады. Машинаны джюрютген адам террорист болады да, ичинде 30 кг тротили болгъан «ВАЗ-2109» машинасын, кеси ичинде тургъанлай, атылтады. Алайда кичи лейтенант Заур Джабилов ёледи, 4 полициячы да джаралы боладыла.

2013-чю джыл майны 20-да Махачкъалада ФССП-ны управлениесини къатында 15 минутну ичинде эки атылыу болады. 4 адам ёледи, 44 адам да джаралы болады.

2013-чю джыл майны 25-де Махачкъалада бир террорист тиширыу ДПС-ни къатына барады да кесин атылтады. 14 адам джаралы боладыла да, аладан 1-и больницада ёледи.

2013-чю джыл сентябрны 16-да Чеченде Сунженский районну Серноводск элинде ОМВД-ны арбазына ичинде террористи болгъан ВАЗ- 21115 машина киреди, террорист кесин да, машинаны да атылтады. 3 адам ёледи, 4 адам да джаралы болады.

2013-чю джыл октябрны 21-де Волгоградда бир террорист тиширыу автобусну атылтады. 7 адам ёледи, 37 адам да джаралы болады.

2013-чю джыл ноябрны 1-де Курган шахарда Вдовин Михаил Васильевич, 46-чы номерли мировой судьяланы юйлерине киреди да гранаталаны атылтады. Сюд приставлада ишлеген Михаил Анатольевич Малинников ёледи, аны биргесине ишлеген Александр Александрович Шаройко да джаралы болады. Ол террорист а больницада ёледи.

2013-чю джыл декабрны 27-де Пятигорск шахарда ГИБДД-ны мекямыны къатында сюелген машинаны террористле атылтадыла да, 3 адам ёледи.

2013-чю джыл декабрны 29-да Волгоградны темирджол вокзалында террористле 10 кг чакълы тротилни атылтадыла. 10 адам ёледи.

2013-чю джыл декабрны 30-да Волгоградны Дзержинский районуну Качинский базарындан узакъ болмай, террористле троллейбусну атылтадыла. 16 адам ёледи, 25 адам да джаралы болады.

2013-чю джыл декабрны 30-да террористле полициячыланы машиналарын атылтадыла да, алайтын озуб баргъан 1 адам ёледи, 4 полициячы да джаралы болады.

2013-чю джыл декабрны 31-де Дагъыстанны Буйнакск шахарында террористле прокурорну болушчусу машинасын атылтыб, кесин да ёлтюредиле.

2014-чю джыл октябрны 5-де Грозныйде, Шахарны кюнюн байрамлаб башланырны аллында, 19 джыл болгъан бир террорист полициячыланы къатларына келиб, кесин атылтханды. 5 полициячы ёлгенди, 12 да джаралы болгъанды.

2014-чю джыл декабрны 4-де Грозныйде террористле «Дом печати» мекямгъа чабыуул этиб, ичине киргендиле. Полициячыла юйню ичин террористледен тазалагъандыла. Террористлени бир къауумлары 20-чы номерли орта школда, бирлери да медицина колледжде бугъуннгандыла. Ол мекямланы террористледен тазалагъан заманда 14 полициячы эмда 1 тюз адам ёлгендиле, 40 адам да джаралы болгъандыла. Террористлени да къыргъандыла.

2015-чи джыл Синай джарым айрымканны башында А321 самолётну атылтхандыла террористле. 217 пассажир, экипаждан да 7 адам - барысы да къырылгъандыла. «Бу къанлы ишни этген бизбиз», - деб, ИГИЛ-ни башчылары боюнларына алгъандыла.

2015-чи джыл декабрны 29-да Дагъыстанда Дербент къалагъа келген туристлеге террористле окъ-тоб джаудургъандыла. 1 адам ёлгенди, 11 адам да джаралы болгъанды. «Бу ишни да биз этгенбиз», - деб, ИГИЛ-ни башчылары боюнларына алгъандыла.

2016-чы джыл февралны 29-да, 4 джыл болгъан Анастасия Мещарикова деген къызчыкъгъа нянялыкъ этиб тургъан Гульчехра Бобокулова, ол къызчыкъны башын кесиб, къолуна алыб, орамгъа чыгъыб, сюелиб: «Аллах Акбар! – деб къычырыб тебрегенди. Россия Сирияны закон бла сайланнган Башчысына, халкъына болушханы ючюн, Россия терроризмге къаршчы кюрешгени ючюн, ол онгсуз сабийни башын кесген шашхынлы мурдар тиширыу, алай этиб Россияны властларына дерт джетдире тургъанлыгъы болгъанды.

2017-чи джыл апрелни 3-де Санкт-Петербург шахарны метросунда, «Сенная площадь» бла «Технологический институт» деген станцияланы ортасында теракт болады. 10 адам ёледи, 50 адам да джаралы болады.

Къуру мен башында окъуб, санаб баргъан бла террористлени эмда алагъа «уу бергенлени» къолларындан 2179 адам ёлгенди. Дагъыда, дагъыда, дагъыда ёлгенле, джаралы болгъанла, сакъат болгъанла, джашаулары терсейгенле, ёмюрлюкге джюреклери кюйгенле…

Багъалы миллетим, багъалы ахлуларым! Терроризмден энди ачырыкъла кимледиле? Мен? Сен? Къарт атабыз? Къарт анабыз? Анабыз? Атабыз? Эгечибиз? Къарнашыбыз? Балабыз? Туудукъларыбыз? Юй бийчебиз? Тенгибиз?.. Мени да, сени да, башхаланы да кишиге чыртда хатабыз болмагъанлай, кеслерин шайтаннга алдатхан, кеси мыйыларын ашагъан, джашауларын джукъгъа санамагъан шашхан мурдарла нек ёлтюрюрге керекдиле? Кишиге зараным, этген хатам болмагъанлай, мурдарланы къолларындан мени ёлюрюм келмейди. Ма аны ючюн къаршчыма мен терроризмге. Ма аны ючюн кесими да, юйдегими да, тенгими да мурдарладан джакъларгъа, сакъларгъа кюрешеме. Сакълар ючюн, джакълар ючюн а не этерге керекбиз? Уллу да, гитче да, къарт да, джаш да бирлешиб, терроризмге къаршчы турургъа керекбиз. Ишекли зат кёргенлей, къатыбызда адамлагъа да, мадар болса полициягъа да билдириб, паника этмегенлей алайдан джанларгъа керекбиз.

Хар бирибиз балаларыбызны, туудукъларыбызны ашхы халкъ адетлерибизге, къралыбызда болгъан иги джорукълагъа, адамгъа заран келтирмеген сыйлы динибизге юретирге керекбиз.

Мурдарланы къолларындан ачыгъандан, Аллах, Сен сакъла барыбызны да… – дейме.

Танг да джарыб келеди.

«Ма бу джарыб келген тангча, джарыкълыкъны, тазалыкъны, джумушакълыкъны, джылыуну, Я, Аллах, хар бир адамны да джюрегине бер», – деб тилейме.

 

Мухамматланы Алибек.

 

 

 
{jcomments}