Къарачай-Черкесияны Башчысы Темрезланы Бориспийни джашы Рашид бла Эресей Федерацияны Ара сайлау комиссиясыны председатели Памфилова Элла Александровна, ишлери бла байламлы тюбешиб, РФ-да президент сайлаула КъЧР-де къалай ётгенлерини эсеблерине къарагъандыла.

Республиканы Башчысы билдиргенден, Элла Александровна Къарачай-Черкесияда Эресейни Президентин сайлау тыйыншлы къурау дараджада ётгенин айтыб, ол джаны бла КъЧР-ни Сайлау комиссиясы бардыргъан ишге иги багъа бергенди. Аны бла бирге республикада территория эмда участок сайлау комиссияланы ишлерин андан ары игилендириу бла байламлы талай магъаналы оюмну да айтханды.

КъЧР-ни Башчысы Темрезланы Рашид да, арт кёзюуде Эресей Федерацияны Ара сайлау комиссиясы бла КъЧР-ни Республикан Сайлау комиссиясыны араларында иш джюрютюу иги джанына тюрленнгенин чертиб, Памфилова Эллагъа бу магъаналы кърал джумушну алай этимли къурагъаны ючюн джюрек разылыгъын билдиргенди.