Арттотурну 5-де Россия Федерацияны Президенти В. Путин къралда конкуренцияны ёсдюрюуге болушууда РФ-ны субъектлерини баш ишлерин ачыкълаугъа атаб Кърал Советни джыйылыуун бардыргъан эди.

Ол джыйылыуда Къарачай-Черкесияны Башчысы Темрезланы Рашид да болгъан эди. Андан къайтхандан сора республиканы Башчысы ол джыйылыуну эсеблери бла байламлы  кенгеш бардыргъанды.
Ол кенгешде КъЧР-ни Парламентини Председатели А. Иванов, республиканы Правительствосуну членлери, Россия Федерацияны Президентини Шимал Кавказ федерал округда Толу эркинликли келечисини аппаратыны Къарачай-Черкесияда баш федерал инспектору И. Дральщиков, аны кибик ФАС-ны эмда Кърал закупканы джергили  управлениелерини келечилери да болгъандыла.


Темрезланы Рашид Кърал Советни джыйылыууну эсеблерине кёре В. Путинни аманатларын толтуруу бла байламлы  этиллик ишлени тизими джарашдырыллыгъын айтханды. Ол тизимге макроэкономика политикадан башлаб, финанс, налог эмда сатыу-алыу системаланы ишлерин игилендирлик инвестицион хауа къураугъа, потребителле бла предпринимателлени эркинликлерин джакълаугъа, административ эмда инфраструктура тыйгъычланы къоратыугъа дери ишлени бары да кирликдиле.
Къарачай-Черкесияны Башчысы федерал излемлеге кёре республикада «Стандарт развития конкуренции в КЧР» деген документ джарашдырылгъанын эмда къабыл этилгенин да билдиргенди. Анда джумуш этиуню 14 тюрлю джолу белгиленнгенди.
Энди КъЧР-ни Правительствосу Темрезланы Рашидни излеми бла ол Стандартны Россия Федерацияны Президенти В. Путинни 618-чи номерли указыны излемине келишгени бла къалгъанын тинтерге керекди. Аны бла бирге республикан Правительство Россия Федерацияда Конкуренцияны ёсдюрюуню юсюнден программа къабыл этилгенлей анга кириуню ишин бардырлыкъды.
Къарачай-Черкесияны Башчысы, ол ишлени юслеринден айта: «Конкуренцияны ёсдюрюу ол къуру къабыл этилген «джол картала» бла Стандартны иземлерин  толтуруу тюлдю. Аны бла бирге конкуренциягъа кърал эмда муниципал башчылыкъ этиуню магъанасын да кёлтюрюудю», - деб чертгенди.
Кенгешде Темрезланы Рашид КъЧР-ни Правительствосу бла муниципал къуралышларындан, Кърал Советни джыйылыуунда айтылгъаныча, бирча кърал реестр бла муниципал рысхыны къураугъа тыйыншлы магъана берликлерин, ишлерин да алада белгилегенлерича бардырлыкъларын излегенди. Аны кибик баджарылыргъа керекли башха ишледе тохтаб сёлешгенди.  Ол ишлени барында да башчылыкъгъа Россия Федерацияны Президенти В. Путинни Кърал Советни джыйылыуунда этген аманатларын алыргъа керекди, деб чертгенди.

 
{jcomments}