Мындан алда Къарачай-Черкес Республиканы Башчысы Темрезланы Рашид Россия Федерацияны Къоркъуусузлугъуну Советини секретары Николай Патрушев Шимал Кавказ федерал округда бардыргъан кенгешни ишине къошулгъанды. Ол Черкесск шахарда бардырылгъанды. Ары келгенлени арасында Россия Федерацияны Президентини Шимал Кавказ федерал округда Толу эркинликли келечиси Олег Белавенцев, Россия Федерацияны культурасыны министрини биринчи орунбасары Владимир Аристархов, Россия Федерацияны окъуу министрини орунбасары Ирина Потехина, Миллет ишледен федерал агентствону тамадасы  Роман Камаев, закон, джорукъ сакълагъан, надзор, къоркъуусузлукъ органланы келечилери, Шимал Кавказ федерал округну регионларыны тамадалары бар эдиле. 

Совбезни пресс-къуллугъу билдиргенден, кенгешде, Джууукъ Востокну регионларындан Шимал Кавказ федерал округну джерине террорист къоркъуу ётмез ючюн, не этерге кереклисини, къаллай ишле бардырыргъа боллугъуну соруулары сюзюлгендиле. Терроризмге къаршчы джумушла бардыра, андан объектлеге заран джетмез ючюн кюреширге кереклиси да айтылгъанды. Къралла арасы экстремист, террорист организацияла Россияны джерине ётмез ючюн, къралыбызны чеклерин сакълауну кючлю этерге кереклисини хакъындан да сёлешиннгенди.
Кенгешни кёзюуюнде кърал властны органларыны, кеси оноуларын  кеслери этген джергили органланы, джаш адамланы патриотлукъгъа бургъан, Джуртну сакълай, конституцион, граждан борчларын толтурургъа чакъыргъан институтланы ишлерин кючлю этиб, керекли джанына таб бурурча сорууланы оноулары да этилгендиле.
Джаш адамланы патриотлукъгъа юретген, аскер, закон, джорукъ сакълагъан къуллукълагъа хазырлагъан джамагъат-кърал организацияланы кючлерин толусу бла хайырланыргъа кереклиси да чертилгенди.
Андан сора алайда Шимал Кавказ федерал округну субъектлерини тамадалары, кенгешде кёлтюрюлген соруула бла байламлы къаллай ишле бардыра тургъанларын хапарлагъандыла.
Къарачай-Черкесияны Башчысы Темрезланы Рашид властны, джамагъат, джаш тёлю организацияланы бизни регионда, джаш адамланы патриотлукъгъа,  тин-иннет юретиуге атаб бардыргъан ишлерини ахыр эсеблерини хыйсабыны  юслеринден айтханды. Къарачай-Черкес Республика кёб миллетли, кёб динли  поликультура регион болгъанын, властла джамагъат бла, миллет эмда дин организацияла бла биригиб ишлегенлерин чертгенди. Алай этилгени республиканы Россия Федерацияны тынч, къоркъуусуз региону болуруна мадар береди, дегенди.
Регионну Башчысы Темрезланы Рашид айтхандан, Къарачай-Черкесияны миллет спектрин къурагъан джамагъат къозгъалыулары, къуралышлары джаш тёлюню ариу халиге юретиуде, аланы джюреклерине интерационалистликни, патриотлукъну, Джуртха кертиликни, сюймекликни сингдирирге болушадыла. Эки джылны мындан алгъа уллу джамагъат, миллет организацияла, джамагъат организацияланы милллетле арасы советин къураргъа деб оноу этгендиле. Ол зат джаш тёлюню тин-иннет бирлигин, республиканы джамагъатында шохлукъ, къарнашлыкъ кючлю болгъанын кёргюзеди.
Андан сора Темрезланы Рашид, сабийле бла джаш тёлюню патриотлукъгъа,  тюз, ариу халиге юретиуге 100 минг адам къошулгъанын билдиргенди. Ала аскер-патриот клублагъа, излеу-тинтиу отрядла бла къуралышлагъа, тарих-краевед кружоклагъа, джаш къазакъ организациялагъа, волонтёр къозгъалыулагъа, коммерция халили болмагъан организацияла джашаугъа кийирген проектлеге къошулгъанладыла. Толтуруучу властны, кеслерине кеслери оноу этген джергили органла, баш, орта билим берген профессионал окъууну учреждениелери, миллет дагъыда башха организацияла 2017-чи джыл тин-иннет эмда граждан-патриот темагъа аталгъан 1000-нге джууукъ иш бардыргъанларын айтханды.
Регионну Башчысы, Шимал Кавказ федерал округну регионларыны тамадалары теджеген оюмланы, Шимал Кавказны хар регионунда «Россия - моя история» деген ат бла музей-кёрмюч комплекс къуралса иги боллугъуну  юсюнден кёлюне келгенни билдире, аллай ашхы зат бусагъатда Ставрополь крайда, Дагъыстанда къуралыб тургъанын айтханды.
 
Лепшокъланы Хусеин.   
 
{jcomments}