Республиканы ара шахары Черкесскеде алгъыннгы Тургенев атлы базарны орнунда, адетдеча, джазгъы республикан джармалыкъ болду. Ары регионубузну бютеу муниципал къуралышларыны сатыу-алыучуларындан сора да Ставрополь, Краснодар крайладан, Адыгей, Къабарты-Малкъар республикаладан келген эдиле. Аны Къарачай-Черкесияны Промышленность бла сатыу-алыу министерствосу республиканы Эл мюлк министерствосу бла бирге къурагъан эди.
«Къарачай-Черкесияны Башчысы Темрезланы Рашид, Правительствосу адамланы ашарыкъ, промышленность товарла бла баджарыу джанына терен эс бёледи», - деди КъЧР-ни промышленность бла сатыу-алыу министрини орунбасары Къаракетланы Мурат.
Ол айтхандан, джыл сайын бардырылгъан джармалыкъ джергили эл мюлк товар чыгъарыучулагъа джакълыкъ этер, адамланы излемлерин толтурур мурат бла къуралады. Ала кеслерини товарларын базардан эсе 15-20 процентге учуз сатханларын да билдирди.
Черкесскеде джашагъанла, къонакъла былайда сатылгъан кёб тюрлю промышленность, ашарыкъ товарланы арасында кереклилерин таба эдиле. Къой, тууар эт эркин эди. Джау, бышлакъ, сют, айран, сюзме, терек, тахта кёгетле, чабакъ, шекер, ун, бал дегенча затла адамны хурджунуна асыры къатылмай сатыла эдиле. Аны тышында орнатыргъа тюрлю-тюрлю кёгет терекчикле да бар эдиле.
Бютеулей да кесини затын 200 товар чыгъарыучу келтирген эди.
Ол джармалыкъда кёб адам излеген затын учуз багъасы бла табыб къууаннганды.
Узеирланы Хусеин.
{jcomments}
