Мындан алда КъЧР-ни Башчысы Темрезланы Рашид Россия Федерацияны эл мюлк министрини биринчи орунбасары Джамбулат Хатуов бла тюбешгенди.

Ала бара тургъан джыл регионда агропромышленность комплексни ёсюмюню, эл мюлкде инвестицион проектлени джашаугъа кийириуню, аграрийлеге мындан ары да кърал болушлукъ табдырыуну юслеринден сёлешгендиле.
Джамбулат Хатуов чертгенден, Къарачай-Черкес Республиканы агропромышленность комплексини уллу ёсюм алыр мадары барды. Ол кеси да инвесторланы кесине бек тартхан регионду.  Эки уллу проектни - асыулу урлукъ хазырлагъан аралыкъ бла республикада терек бачхаланы джангы тюрлюсюн къурауну проектлерин - джашаугъа кийирилгенлери аны алайлыгъына толу шагъатлыкъ этедиле. Ол эки проект джашауда орун Россияны Эл мюлк министерствосуну болушлугъу бла алгъандыла.


Тюбешиуню кёзюуюнде  Хатуов Джамбулат Россияны Эл мюлк министерствосу, мындан ары да АПК-да орун алгъан проектлени джашаугъа кийире, эллени ёсюмлерини юсюнде бизни регионну джакъларыгъын айтханды.
Тюбешиуню аягъында Темрезланы Рашид, бу программаны бизге уллу магъанасы болгъанын черте, быйыл мындан ары да Россияны Эл мюлк министерствосу бла бирге этиллик ишле белгиленнгенлерин билдиргенди.

 
{jcomments}