«Бир адамны джанын къалдыргъан саулай адам улуну къутгъаргъанча бир игилик этеди», – дегенди буруннгу акъылман.

Дунияда джашаудан багъалы джукъ да джокъду. Аны себебли адамланы джашаугъа къайтаргъан адамланы алларында баш иерге тыйыншлыды.
Быйыл элия (июль) айны 2-де Гитче Къарачай районну Ючкекен элинде джашагъан бир тиширыу эки гитче сабийчиги бла суу джагъагъа солургъа баргъанды. Уллу джашчыгъына тёрт джыл болгъанды, сегиз ай болгъан къызчыгъы да боюннга тагъылгъан сумкада тургъанды.
Ана ары бурулуб, бери бурулгъунчу, джашчыгъы суугъа киргени бла, аны суу алыб тебрейди. Аны кёрген ана, асыры эс ташлагъандан, бойнунда сумканы тешерге да тёзмей, аны бла бирге сабийни къутхарыр иннетде суугъа секиреди.
Уруб келген толкъунла ананы да, эки сабийни да алыб 600 метр чакълы элтедиле.
«Ёлмезлик эчкиге къыш арада чырпы башы чагъар» дегенлей, ол кёзюуде джыйырма бла юч джыл болгъан Батдыланы Казимни джашы Динислам аланы кёрюб къояды.
Юйдегиге къыйынлыкъ джетгенин ангылаб, ол, эрлай аланы суудан чыгъарыргъа деб, къобаннга секиреди. Эм алгъа эки сабийни къутхарыб, ызы бла аналарын да суудан алады.
Гитче къызчыкъ тунчугъуб, солууун алалмай тургъанын кёрюб, Динислам анга билгенича болушлукъ этиб башлайды. Сабий ичинде сууун тёгюб, солуб тебрейди. Бёлек замандан «Терк болушлукъну» машинасы джетиб, ючюсюн да больницагъа джетдиреди.
Бу хапар дженгил соцсетлеге джайылады. Адамла бир аууздан Батдыланы Динисламгъа разылыкъларын билдириб джазадыла. Аны керти джигитлик этгенин чертедиле – ол болмаса, ючеулен джашаудан айырыллыкъ болгъанларын ким да ангылайды.
«Биз джигит, ётгюр, халал джюрекли джашыбыз бла ёхтемленебиз», – деб джазадыла.
Айхай да, миллет барысы да ёхтемленирча бир джашды Динислам. Аны таукеллигини, джигитлигини, уллу адамлыгъыны аллында, кертиси бла да, баш иерчады.
Суудан сау чыкъгъанланы экинчи кере дуниягъа туугъанлары бла алгъышлай, аланы къутхаргъан джашха да махтау сала, барыгъыз да джашаулу, саулукълу болугъуз, дейбиз.

Мамчуланы Дина.