Хар окъуу джылны ахырында орта школланы тауусхан джашла бла къызла ЕГЭ-ле бередиле, кърал экзаменлени тамалында баш окъуу заведениелеге киредиле. Быйыл бизни республикада школну тауусханланы ичинде талай адам ЕГЭ-леде 100 балла алгъандыла. Бюгюн газет окъуучуларыбызны ала бла шагъырей этерге излейбиз.
Черкесск шахарны 9-чу номерли гимназиясын тауусхан Эльза Джутова литературадан ЕГЭ-де 100 балл алгъанды. Эльза литературадан, обществознаниеден, ингилиз тилден, технологиядан сохталаны арасында бардырылгъан олипиадаланы муниципал кёзюулеринде алчы орунланы алгъанды. Ол айырмагъа окъугъаны бла бирге хунерлик ишле бла да кюрешеди.
Черкесск шахарны 9-чу номерли гимназиясын тауусхан Ёзденланы Имран физикадан баш багъаны алгъанды. Ол олимпиадалагъа, конкурслагъа къошулуб, алчы орунланы алыб тургъанды. Н.Э. Бауман атлы МГТУ къурагъан «Шаг в будущее» деген олимпиаданы «Инженерное дело» номинациясында хорлагъанды. Аны бла да къалмай, Имран саулай Эресейде сохталаны арасында бардырылгъан олимпиадада 1-чи дарджалы дипломгъа ие болгъанды. 2024-чю – 2025-чи эмда 2025-чи – 2026-чы окъуу джыллада физикадан сохталаны арасында бардырылгъан бютеу Эресей олимпиаданы муниципал этапларында алчы орунланы алгъанды.
Черкесск шахарны 17-чи номерли гимназиясын тауусхан Артём Федосеев да физикадан 100 баллгъа ие болгъанды. Ол тюрлю-тюрлю конкурслагъа, олимпиадалагъа къошулуб, фахмусун, билимин танытханлай тургъанды. Башха экзаменлерин да джетишимли бергенди.
«Медина» деген энчи школну тауусхан Дотдайланы Эльдар профиль математикадан 99 балл алгъанды. Эльдар профиль классны математика къауумунда окъугъанды, экзаменлеге хазырланнган кёзюуюнде къыйын ишлени баджырыугъа уллу эс бёлгенди. Алай бла, экзаменлени джетешимли бергенди. Аны бла да къалмай, Эльдар китаб окъургъа, сурат салыргъа сюеди, назмула джазады. Ол М.В. Ломоносов атлы МГУ-ну экономика факультетине кирирге мурат этеди.
Черкесск шахарны 9-чу гимназиясын тауусхан Олег Панин географиядан 100 балл, орус тилден 94 балл, тарихден да 84 балл алгъанды. Аны бла бирге башха экзаменлени да джетишимли бергенди. Олег тарихден, географиядан тюрлю-тюрлю дараджалы олимпиадалада алчы орунлагъа тыйыншлы болуб тургъанды.
Хабез элде лицейни-интернатны тауусхан Алина Кондохова биологиядан 100 балл, химиядан 97 балл, орус тилден да 94 балл алгъанды. Алина школда айырмагъа окъугъанды, не ишде да джууаблылыгъын танытханды. Ол лицейни-интернатны тауусхан Амин Абдоков да химиядан 100 балл алыб, терен билимин танытханды.
Черкесск шахарны 5-чи номерли гимназиясын тауусхан Камилла Балабина химиядан 99 балл алгъанды. Ол да айырмагъа окъугъанды, олимпиадалада алчы орунлагъа ие болгъанлай тургъанды.
Бу джаш адамлагъа да, школну тауусханланы барына да джетишимле теджей, этген муратларыгъыз толсунла дейбиз.
САЛПАГЪАРЛАНЫ Умар.
