Белгилисича, быйыл къыркъаууз (сентябрь) айны 18-ден 20-на дери РФ-ны Кърал Думасына депутатла сайланныкъдыла. Ол джууаблы ишге хазырланыу, къралыбызны башха джерлеринде кибик, бизни республикада да барады.

Аллай кёзюуде джорукъ сакъланырча этиуню магъанасы уллуду. Бу кюнледе КъЧР-ни Джамагъат палатасында сайлаула бла байламлы штабны кенгеши ётдю. Кенгешни Джамагъат палатаны тамадасы Елена Ляшова бардырды. Сайлауланы законну-джорукъну тамалында бардырыр ючюн къаллай излем салыннганыны юсюнден «Независимый общественный мониторинг» ассоциацияны эсперти, алим Елена Щербина доклад этди. Джамагъат палатаны къурамына кирген адамла да докладны таб джарашдырылгъанын, магъаналы болгъанын черте, оюмларын айтдыла. Къайсы партияла сайлаулагъа къошулгъанларыны, законда къаллай тюрлениуле этилгенини юсюнден да сёлешдиле.
Сёзсюз да, аскер къаугъа бара тургъан кёзюуде, тыш къралла бизни къралгъа тиш къысыб, ётюрюк хапарланы джайыб кюрешген заманда, къралда сайлауланы бардыргъан тынч иш тюлдю. Алай болса да, бизни къралны кёб миллетли джамагъаты биригиб, бу джууаблы ишде да бет джарыкълы боллугъуна ышаннганларын чертдиле.