Мындан алда Кърал автоинспекцияны 90-джыллыгъына аталыб, Къарачай-Черкесияны Ич ишлерини министерствосунда къууанч джыйылыу болду. Анга кёб адам келген эди. Джыйылыуну Къарачай-Черкес Республиканы Башчысы Темрезланы Рашид ачыб, Кърал автоинспекцияны къуллукъчуларын байрам бла алгъышлады.
«Бюгюнлюкде толтуруучу власть органланы, муниципалитетлени, Кърал автоинспекцияны алларында терен магъанасы болгъан ишле бардыла. Джоллада джюрюгенле кёб болуб барадыла, джыл сайын джангы машинала чыгъадыла. Алай бла, джолда джюрюуню джорукъларына уллу эс бёлюнюрге, профилактика ишле бардырыб турургъа тыйыншлыды. Ол ишле къралыбызны Президенти Владимир Путин 2030-чу джылгъа дери джолда джюрюуню къоркъуусузлугъун ёсдюрюуню хакъындан бегитген стратегияда ачыкъ айтыладыла. КъЧР-ни МВД-ны Кърал автоинспекция управлениесини къуллукъчулары, республиканы власть органлары бла биригиб, ол ишлени тыйыншлысыча толтурлукъларына ышанама», – деди Темрезланы Рашид.
Аны ызындан Къарачай-Черкес Республиканы Ич ишлерини министри Владимир Нефедов сёлешди. Ол кесини сёзюнде ГАИ 90 джылны ичинде кесини магъаналылыгъын кёргюзгенин айтыб, джашауларын ол усталыкъгъа атагъан джигит, джигер адамлагъа бюсюреу этди. Ол, бу къуллукъну ветеранларына энчи разылыгъын билдире, ала, усталыкъларын иги билген, кече-кюн демей кюрешген адамла, хар заманда да къоркъуусуз джюрюрча мадарла къураб кюрешгенлерин, уллу иш сынамларын джаш тёлюге бергенле сыйгъа-махтаугъа тыйыншлы болгъанларын айтды. Владимир Нефедов КъЧР-де ГАИ-ни къуллукъчулары мындан ары да, джууаблы ишлерине толу берилиб, алагъа салыннган борчну сый бла толтурлукъларына ышаннганын да билдиргенди.
Аны ызындан КъЧР-ни МВД-ны Джамагъат советини тамадасы Тебуланы Джамал да сёлешди. Ол ГАИ-ни къуллукъчуларын санагъат байрамлары бла алгъышлады. Кърал автоинспекцияны къуллукъчулары, республиканы джолларында терен магъанасы болгъан профилактика ишле бардыра, джоллада джюрюген адамланы къоркъуусузлукъларын сакълай, кече-кюн демей кюрешиб тургъанларын, ала, джигер, джигит, таукел, тири адамла, къралны законуну тамалында алагъа салыннган борчланы сый бла толтургъанларын чертиб сёлешди. Джамагъат Совет бу джаны бла къаллай ишле къураб, бардырыб тургъанын да айтды.
Джылы алгъышлауну, сый, махтау бериуню ызындан МВД-ны Кърал инспекциясына 90 джыл толгъаны бла байламлы эмда кеслерини къуллукъларын юлгюлю толтура, тутхан ишлеринде мийик джетишимлеге ие болгъанла кърал, ведомство саугъала бла КъЧР-ни Башчысыны Бюсюреу къагъытлары бла, сыйлы белгиле бла саугъаландыла.
Лепшокъланы Хусеин.
