Черкесскеде адамла эркинликлери болмагъанлай ишлеген объектлени кетериб барадыла. Айтыргъа, 2026-чы джылны аллындан бери 214 конструкцияны къоратхандыла.

Черкесскени администрациясында айтханларына кёре, сёз павильонланы, гаражланы, темир къабакъ эшиклени, бурууланы эмда шлагбауумланы юслеринден барады. Ала Ленин эмда Лермонтов атлы, Международная орамлада, Пятигорское шосседе, Октябрьская, Шоссейная эмда башха орамлада ишленнгендиле.
Джылны аллындан бери ол кемликлени тюзетиуге джораланыб, 81 къагъыт джарашдырылгъанды. Бир къауумла ишлеген затларын кеслери къурутхандыла, алай этерге унамагъанланы законну тамалында кетерирге керек болгъанды.
– Адамланы эслерине салыргъа излейме: 8(8782)28-11-50 номерге сёлешиб, ишлерге бла къалыргъа боллугъун соруб билирге керекди. Айтыры, сорлугъу, тилеги, тарыгъыуу болгъан бизни соцсетлеге джазаргъа эркинди. Ол затладан хапарлы, алагъа джууаблы къуллукъчуларыбыз не этерге тыйыншлысын айтырыкъдыла. Керек болса, тюбешиб, ушакъ да этерикдиле, – деб билдиргенди Черкесскени мэри Алексей Баскаев.
Архитектураны бузгъан, келишмеген объектлени кетериу шахарны айбат этиу бла байламлыды. Ара шахарыбыз ким да джаратырча болур ючюн, «Зеленстройну» адамлары хансны чаладыла, гокка хансла саладыла. Айтыргъа, 40 минг квадрат метр джерни джарашдырадыла. Бютюн да ара орамлагъа айырыб уллу эс бёлюнеди.