Эресейни халкъларыны бирлигине эмда Бойсунмагъан Къралланы Бирлешлигини (СНГ) 35-джыллыгъына аталыб, Москваны ВДНХ-да «Халкъланы шохлугъу» деб миллет къонакъбайлыкъны фестивалы барады.

Анга кесини юлюшюн Къарачай-Черкесия да къошханды.
Фестивалны тамалында «Къарачай-Черкесия: къонакъ сюйген тау джер» деб эшикде сурат кёрмюч ачылгъанды. Анга кёз джетдирген таурухлу джерлерибизден, аны сейирлик табигъатындан, республиканы атын айтдыргъан эсгертмелеринден, ёмюрлени теренинден келген миллет адетлеринден хапарлы боллукъду.
Хар суратны къатында QR-код барды – аны бла республикадан терен хапарлы болургъа излеген хайырланаллыкъды. Ала кеслери джаратхан джерлени юсюнден кёб зат билирге боллукъдула.
Къарачай-Черкесия хазырлагъан маданият программагъа да джыйылгъанла эс бёлюб къарайдыла. Аны юсюне да музыкантла усталыкъларын кёргюзедиле, халкъ тепсеуле бла байламлы мастер-классла бардырыладыла, спектаклле кёргюзюледиле. Ол спектаклледе Ата джуртха сюймекликни, миллетлени арасында шохлукъну, тёлюлени бир-бирлери бла байламлылыкъларыны, юйдеги насыбны, ана тилни, адетлени билирге кереклисини юслеринден айтылады.